Latest News

Northeast Yatra for Lifestyle (LiFE) in Mizoram hawng

India hmarchhak State pariat-a November thla chhunga neih tur Northeast Yatra for Lifestyle (Life) hawnna chu nimin khan MPCB Conference Hall, Aizawl-ah neih a ni.

Northeast Yatra for Lifestyle (LiFE) in Mizoram hawnna hun nimin-a neih ah hian Mizoram Pollution Control Board Member Secretary Er. C. Lalduhawma chuan Environment humhim leh venhim kawnga hma la nasa turin mipui rilru kaihthawh a, a zau thei ang bera tidarh turin kalkhawmte a fuih a. Hman khat daih Plastic, Single Use Plastic khap chungchangah pawh a bul tantu ni tur leh midangte zirtirna pe turin kalkhawmte hnenah ngenna a siam nghal bawk.

Northeast Yatra for Lifestyle (Life) hi Northeast State pariat (8)-ah November thla chhung hian neih tur niin Mizoram-ah chuan Mizoram EIACP Hub - MPCB hnuaia din Yatra Team-te’n District tinah Yatra hi an kalpui dawn a. Nimin a hawnna hun kaihruaitu Er. Benjamin Lalnunsanga Colney, Programme Officer, Mizoram EIACP Hub – Mizoram Pollution Control Board chuan Mission LiFE (Lifestyle for Environment) chungchang leh Northeast Yatra for Lifestyle Mizorama kalpui a nih dan turte sawifiahin Yatra programme-in a tum ber chu environment him leh tlo zawk kan neih theih nan mi tinte’n kan nunphung pangngai kalsana environment tana tha zawk nunphung thlang tura inzirtir a ni tih a sawi a. Ditrict hrang hranga Yatra kalpui dan tur power point presentation hmangin C. Malsawmzuali, Scientist ‘B’ in hrilhfiahin Yatra Kick off Programmme hi District hrang hranga Yatra Team-te’n Online Google Meet kaltlangin an lo chhim ve bawk a ni.

Northeast Yatra for Lifestyles (LiFE)-ah hian mipuite hnenah tam zawk leh zau zawkin ‘environment’ humhalh leh venhim pawimawhzia zirtirna pek a ni ang a, activities hrang hrang – Awareness campaign, House to House Campaign, Mass Rally, Cycling, Lui tihfai hnatlang, hman khat daih Sarang chhar fai hnatlangte leh Online Quiz-te he Yatra chhung hian neih a ni ang.

Comments

Popular News (Last 30 Days)