ASF vanga Vawk suat tan zangnadawmna dil mek

Kum 2021-a Mizoram-a African Swine Fever (ASF) avanga Vawk suat te hnenah zangnadawmna cheng nuai 1,169.94 pek niin kum 2022-a Vawk suat neitute tan zangnadawmna Rs. 5,26,63,300 dil leh mek a ni a, sanction hmuh thuai beisei a ni.

RTI Act tlawhchhana zawhna Animal Husbandry & Veterinary (AH&Vety) Department-in an chhàn danin, Vawk pûl hri African Swine Fever (ASF) vangin kum 2021-22 chhung khan Mizoram-ah ASF vanga vawk thi leh suatte hlut zawng chu Rs 1,28,58,94,000 nia chhût a ni a; kum 2022-a Vawk suat neitute tan sawrkar laipuiah zangnadawmna cheng nuai 526 dil mek niin kum 2023 chhunga ASF vanga Vawk thi leh suatte hlut zawng erawh kum kal mek a nih vangin chhût a la ni lo thung a. Kum 2021-2023 chhungin Mizoram-ah ASF vanga Vawk thi 47,247 leh suat 25,102 awmin ASF avanga Vawk chan hi a vaiin 72,349 a tling a ni.

ASF vanga Vawk thi neitute tan sawrkar laipui inkaihhruaina (Central guidelines)-ah zangnadawmna pek theih a nih loh thu tarlangin AH&Vety SPIO chuan, “Vawk suat (culled) tan chauh zangnadawmna dil theih a nih avangin Mizoram sawrkarin sawrkar laipui-ah zangna-dawmna a dil,” a ti a. Kum 2021-22 ah khan AH&Vety Department a Vawk thi leh suat te hnenah chauh zangnadawmna hi pek a lo ni tawh bawk a ni.