PC Party in sawrkar thar ram tihmasawn tur leh tihausa turin an beisei tih an sawi

PC Party chuan Mizoram-a sawrkar thar lo piang tur chu ram tihmasawn tur leh ti hausa tura an duh leh an beisei thu an sawi.

Nimin-a Aizawl-a an Office thar-a thuthar thehdarhtute an kawmna ah PC Party President Vanlalruata chuan kan ramin hma a sawn tak tak na turin kan ram inrelbawl dan siamthat a, sawrkar inenkawl leh inrelbawlna hautak lutuk tihreh a ngai tih sawiin, “Hemi atan hian sawrkar inrelbawl dan siamthat (Administrative reform) leh Sum enkawl dan siamthat (Fiscal reform) a ngai. Chu mai bakah ram hruaituten an eiruk loh a, eiru an hrem a tul,” a ti a. “Eng party pawh sawrkar se kan ram an hmangaih a nih chuan heng hi tih theih a ni a, keini chu sawrkar ila kan ti ngei ang,” a ti bawk.

Ram hausa kan nih theih nana hmalak chu sawrkar mawhphurhna a nih thu pawh PC Party President chuan sawiin, “Chumi a nih theih nana kan rama Industry din kawng a hmasawnna (Industrial revolution) thlen leh kan ram hi India, Myanmar leh Bangladesh, chumai ni loa South East Asia ram te insumdawntawnna hmunpui - Indo-Myanmar-Bangladesh (with ASEAN) Trade Hub-a insiam te hi eng party pawh sawrkar se kan ram leh hnam dinchhuah tak takna an duh a nih chuan thil tih theih ngei a ni,” a ti a, sawrkarna an chan chuan an tih ngei tur thu a sawi bawk.