Mizoram-a Jail thenkhat ah Jail tang an tawt

Mizoram-ah mi tang 1,386 awm theihna Jail 10 a awm a, hetihlai hian tun dinhmuna tang awm zat chu 2,116 an tling a. Aizawl-a Central Jail leh Central Women Jail-te chu tang thei zat bituk (capacity) aia tang awm tam zualna an ni.

Prison Department tarlan danin mi tang 438 awm theihna Central Jail, Aizawl-ah hian tang 977 an awm mek a, an zingah hian damchhung tang tur (lifer) mi 54 awmin an vai hian mipa vek an ni. Central Women Jail-ah tang 305 awm mek bawkin, he Jail hi tang 96 chauh awm theihna a ni.

Mi tang 90 awm theihna, District Jail, Aizawl-ah tang 168 awm mek bawkin, tang 109 awm theihna District Jail, Lunglei-ah tang 163 an awm mek a, he Jail-ah hian damchhung tang tur mipa pakhat a awm a. Tang 105 awm theihna, District Jail, Champhai-ah tang 196 an awm mek bawk a ni.

Hengte bakah Jail dang - District Jail Mamit, District Jail Serchhip, District Jail Lawngtlai, District Jail Kolasib leh District Jail Siaha-ah te chuan tang awm thei zat bituk aia tlem Jail tang an awm mek thung a. Hetianga Jail thenkhat a tawt avang hian sawrkar hian tang tlem deuhna Jail-ah te hian tang tam deuhna a mi te sawn then tumin ruahmanna a siam mek a, Serchhip District Jail-ah pawh hian Champhai District Jail atangin tang rawn dah turin an buaipui mek nia hriat a ni bawk.