Serchhip District Volleyball Championship khelh tan a ni

Serchhip District Volleyball Association buat-saih ‘Serchhip District Volleyball Championship 2023’ chu nimin khan Serchhip Vengchung Volleyball Court-ah khelh tan niin tunkar Zirtawpni khian Final khela zawhfel a ni ang.

Serchhip District Volleyball Championship 2023 hi Serchhip-a Sr. Chief Medical Officer Dr. LP. Malsawma chuan khuallian nia hawngin Volleyball Championship an khelh turah inelna rilru lian lutuk aiin kan District chhung inunauna tha thlentu ni tura inkhel turin he Championship-a tel te chu a chah a. Ruihhlo in kan ram nasa taka min run thu sawiin, thalai tam tak ruihhlo bawih ah tangin, inkhel duh mah se inkhel thei lo tam tak an awm thu a sawi a. Sawrkar pawhin ruihhlo dona ah Task Force te dinin hma la mah se ruihhlo ti tawh ten sim harsa an tih avangin a la ti ve lo te venhimna kawngah hmalak mek a nih thu leh tih chhin avanga ngawlveina a lo awm thin avangin tih chhin loh chu kan mamawh ber a ni tih sawiin, thalaite chu an hunawl te an taksa sawizawina hun atana hmang turin a chah bawk.

Serchhip District Volleyball Association Sr. Vice President VL. Hruaitluanga kaihhruai he hunah hian Match Commissioner Ramthianghlima Ralte chuan Technical Report a pe a, tunhnaia boralta SDVA Secretary C. Laldinpuia sunna hun an hmang bawk a ni.

Serchhip District Volleyball Championship 2023-ah hian Mipa-ah Team 9 leh Hmeichhia ah Team 4 telin Pool hnih-ah ve ve then an ni a, Pool khat-a awm te hi inhmachhawnin tunkar Nilaini thlengin Pool Match hi khelh a ni anga, Pool tina a sang pahnih ten Semi Final lutin tunkar Ningani-ah Semi Final leh Zirtawpni-ah Final an khel dawn a ni.

Tun tuma Championship-ah hian Mipa ah Serchhip Town pawnlam atangin Keitum, Khawbel leh Bungtlang atangin Team an rawn tel a, Hmeichhia-a tel Team 4 te hi Serchhip Town chhunga mi te vek an ni thung.