Bungraw chah man chawi ang ngei-a pe turin ngen

Serchhip District Consumers Association (SDCA) chuan Serchhip khawpui chhunga Delivery/Courier Agent te chu an hnena bungraw lo thleng te a chahtu ten an chah man an pek ang ngeia an hnena thlen thin turin an ngen.
Nimin a thuchhuah an siamah SDCA chuan tunlaiah Ser-chhip khaw chhungah pawh miten Private Courier/Delivery Agent te an chhawr tangkaiin Online in thil an chah nasa tawh hle tih an tarlang a, hei hi hmasawnna in a ken tel zel anih avangin thil lawmawm tak a nih thu leh Serchhip a Delivery Agent hrang hrang te chu mipui rawngbawltu anni tih hriaa tha taka service pe turin duhsakna an hlan thu an tarlang a. Hetih lai hian Delivery Agent thenkhat zingah miten an thil chah liantham deuh emaw leh lian tham lemlo te pawh anmahni In-a thlen peih lo a, Office a lam tura phone kual thin an awm tih hriat a nih thu leh Agent thenkhat chuan a chahtute hnena pek (deliver) peih lovin lam turin an ti a, an lam duhloh chuan an cancel sak bawk thin tih te hriat a ni tih an tarlang a, hemi chungchangah hian Consumer lamah report a luh thu an tarlang.

SDCA chuan hetiang thil hi an ngai thu takin chin dan tha lo tak nia an hriat thu an thu-chhuah ah hian tarlangin, Serchhip khawpui chhunga Delivery/Courier Agent te chu an hnena bungraw lo thleng te a chahtu ten an chah man an pek ang ngei a a chahtute hnena thlen thin turin an ngen tih an tarlan bakah mipui rawngbawla sum-dawng an nih angin an rawng bawl sak-a te mit tlung taka hawihhawmna leh dawhtheihna nena an sumdawnna kalpui turin an ngen bawk tih an tarlang a. “Online hmanga bungraw chahtu ten an bungraw chah te an chah laia address a tarlanna hmun ngei a him dam taka thlentir hi Delivery/Courier Agent te mawhphurhna a ni a, mipui te pawh hemi kawngah hian kan chanvo te hria a, dan zawmlo an awm anih chuan a ruka ngawih bopui mai lova Consumer Assn/Court lama zualko na chang hre turin kan inngen bawk a ni,” an ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar