Delhi-a NHIDCL Office tlawh

Lengteng Bialtu MLA Dr. L. Thangmawia chuan nimin khan New Delhi-a NHIDCL Hqrs. Office tlawhin Mizoram lam bialtu NHIDCL-a General Manager (Technical) M. Khalid chuan a lo dawngsawng a, Dr. L. Thangmawia hian a bial kaihhnawiha NHIDCL hmalakna te sawipuiin a zawtfiah bawk.

NHIDCL hotute hnenah hian Dr. L. Thangmawia chuan November, 2021-a Chief Minister Zoramthanga’n Hliappui atanga Kawl-kulh, Puilo leh helai tlangdung kaltlanga Serchhip bula Lunglei kawng pawh tura National Highway thar Central sawrkar-a rawtna a lo thlen tawh chu kawng pawimawh tak tur a nih thu sawiin, Sawrkar policy anga KMMTP kawng leh Myanmar-a Sittwe lawngchawlhna hman tangkai a nih theih hunah chuan Mizoram hmarchhak mai bakah Manipur State tana Highway pawimawh ber tur a nih thu a sawi a. Tuna Highway awmsa aia KM 60 chuanga a tawi zawk dan tur map atanga en ho in, hei hi a rang thei ang bera ti hlawhtling turin a ngen nghal bawk a. NHIDCL General Manager chuan theihtawp chhuaha a lo bawhzui nghal tur thu a lo hrilh a ni.

Hei bakah hian Lengteng Bial chhunga Mimbung bul, Tuivai lui atanga Defence Road siam thar tur chungchang MLA Dr. L. Thangmawia hian zawtfiah nghalin, Tuivai kama tawp tawp lova, Tuivai lei dawh nghal turin a ngen a. NHIDCL hotute chuan he Defence Road hi Lengteng bial Tuivai atanga intanin, Myanmar ramri hrut phei zelin Zorinpui-ah a tawp dawn tih lo hrilhin a. A Project hmingah ‘Indo-Myanmar Border Road’ (IMBR) an vuah thu leh KM 780 a thui tur a nih thu te, Kum 2024 March thlaah Detail Project Report (DPR) an peih hman tur thu te an lo hrilh bawk a. Tuivai lei dawh pawh DPR-ah an lo telh tur thu an lo hrilh bawk a ni.

NHIDCL hotute chuan tun atanga kum hnih chhungin Mizoram-ah inkalpawhna kawng tha tak siam zawh hman ngei an tum thu MLA hi an lo hrilh a ni.

Comments

Popular News (Last 30 Days)

LPG man bithliah thar