NH. 54 siam meka zangnadawmna la tawh zinga In la thiat loh te karleh ah thiah sak an ni dawn
National Highway-54 laihzauh leh siamthat hna thawh mek hi nakum (2024) March thla ah hawn hman tum niin kumin chhung hian hna te hi thawh zawh hman tumin chak taka hmalak mek a ni a. Nimin lama tarlan tawh angin Serchhip District Bawrhsap leh Serchhip District-a Competent Authority for Land Acquisition (CALA) David Lalthantluanga chuan niminpiah khan Chhingchhip leh Chhiahtlang khaw chhunga NH. 54 laihzauh leh siamthat hna thawh mek hi a hmunah tlawhin hnathawh dan te a enfiah a. District Bawrhsap chuan Serchhip District huamchhunga sawrkarin ram a lak fel tawh, dan anga zangnadawmna - Compensation leh Rehabilitation and Resettlement sum leh pai dawng tawh te zingah In leh lo thiat duh lo lui an la awm avangin Dan anga hmalak a ni dawn tih a sawi a. Hetianga mahni In leh lo la thiat duh lo te hi July leh August thla khan Magistrate ten an In-ah kal chilhin an In te thiat tura thupek, Eviction Notice an lo pe leh tawh a. August thla chhunga thiat ngei tura beisei an nih laiin tun thlenga thiat lo la awm te chungah karleh atang khian Dan angin hmalak zui a ni dawn ta a ni.
Thudawn danin heng zangnadawmna la tawh zinga mahni In leh lo la thiat lo te hi karleh khian IPC Section 188 hmangin thubuai siamsak an ni dawn a, hemi hnuaiah hian Jail tan thlengin heng mi te hi hrem theih an ni dawn a. Hei bakah hian kar tir lamah-ah Magistrate kaihhruaiin an In leh lo te chu khawl hmanga nawrchhiat sak an ni dawn bawk a. Hetianga dan anga action lak kher a ngaih lohna turin District Administration chuan Serchhip District chhunga khaw hrang hranga In thiat duh lo la awm te chu thiat vek turin a hriattir nawn leh a ni.
Tarlan tawh angin NH-54 kawngpui laih mekah hian Serchhip District huamchhunga compensation dawng tawh zingah 93% chuan an In te an thiat fel tawh a. Mi tlem te chauh thiat lo la awmin Chhiahtlang leh Chhingchhip khua ah hian hma la la lo hi mi 6 vel an la awm mek nia thudawn niin Khumtung leh Baktawng lamah chuan In thiat turte hian hma an la tan vek tawh nia thudawn a ni a. Heng khaw hrang hranga Village Council te, khawtlang hruaitute leh khawtlang mipui ten kawng tha a awm theihna tura sawrkar hmalakna an thlawp tlat avangin District Administration chuan lawmthu an sawi bawk a ni.
Comments
Post a Comment