Serchhip District-ah Dec. 3, 2023 zing dar 8:00 atangin Vote tla chhiar tura ruahman a ni

Mizoram Legislative Assembly Inthlanpui neiha Serchhip District chhung Bial pathum a Vote tla te December 3, 2023 zing dar 8:00 atanga chhiar tura ruahmanna siam mek zel niin nimin khan Vote tla chhiar turte tan hian Training neih a ni.
Election Commission of India in Mizoram Assembly Inthlanpui a Vote tla te thla thar December ni 3-a chhiar tura ruahmanna a siam angin Serchhip District-ah pawh ruahmanna siam mek zel a ni a. Nimin khan Vote chhiar tura ruat te tan Brilliant HSS-ah Training neih niin Vote chhiar tur hian Counting Assistant mi 45 leh Counting Supervisor mi 35 ruat an ni a, heng bakah hian Micro Observer tur mi 41 ruatchhuah ni bawkin heng mi te tan hian thla thar December 1 khian Training neih leh tur a ni ang. Nimin a Vote chhiar turte tana Training neih hi ARO leh Master Trainer Gaston Vanlalhriatpuia chuan kaihruaiin Serchhip Addl. DC Lalnundika chuan a telpui a, Serchhip SDO (S) Rebecca Laldinmawii Hrahsel, East Lungdar BDO Albert Vanlalruata leh SDC Lalhruailiana Zote ten zirtirna hi an pe a, Vawiin hian Counting Agent, Political Party leh Candidate aiawh turte tan Training hi neih leh tur a ni ang.

Serchhip District chhunga Vote tla te chhiar tur hian Counting Assistant mi 45, Counting Supervisor mi 35 leh Micro Observer mi 41 ruatchhuah niin Vawiin hian 1st Randomization neih a ni dawn a, hetah hian Vote chhiar turte leh thlaveng-a awm turte thlanchhuah niin thla thar December 2-ah 2nd Randomization nei lehin hetah hian Vote an chhiar tur Bial hriat leh theih a ni anga, a tuk December 3 zing dar 5:00-ah 3rd Randomization nei lehin hetah hian Vote chhiar turte hi an thutna tur hmun, Dawhkan siam sak leh an ni dawn a, hemi rual hian EVM-a Vote tla chhiar tur bakah Postal Ballot chhiar turte pawh hriat vek theih a ni tawh dawn a ni. Vote chhiar turte hi zing dar 7:00-ah chuan an Duty-na tur hmun thleng vek tura tih an ni a, EVM-a vote tla te chhiar tan hma darkar chanve-ah Postal Ballot-a Vote tla te hi chhiar tur a nih avangin zing dar 8:00-ah Postal Ballot-a Vote tla te hi chhiarin zing dar 8:30-ah EVM-a Vote tla te chhiar tan tura ruahman a ni.

Tarlan tawh angin Serchhip District chhung Assembly Bial pathum te tan hian Counting Hall hrang theuh siam niin Hall pakhat-ah hian Dawhkan 8 zel dah a ni dawn a. Polling Station indawt zel-a Vote tla te hi chhiar tur niin tum khat-ah Polling Station 8 zel chhiar a ni dawn a, hemi ang hian Round 4-ah Vote tla te hi chhiar zawh hman vek a ni dawn a, Serchhip District chhunga Assembly Bial pathum-a Vote tla te hi chawhma lamah chhiar zawh vek hman beisei a ni.