Serchhip Branch Young Mizo Association-in YMA Golden Jubilee a hman dan tlangpui

Serchhip Branch Young Mizo Association-in YMA Golden Jubilee a hman dan tlangpui

- F. Lalawikunga,

Secretary

(He thuziak hi nimin-a vuiliam tak Pu F. Lalawikunga, Serchhip Field Veng hriatrengna atana Pu Lalhmangaiha Chawngthu, AOC Veng in a rawn dah anga tarlan a ni e)

Mizorama thalai zawng zawngte insuihkhawmna leh kan lungrual tlanna ber, kum 1935-a din tan Y.M.A chuan kumin 1985 hian kum sawmnga a nihna chiah 'Golden Jubilee' kum chu a lo thleng ta a. He hun hi keini Serchhip Branch Y.M.A chuan kan theih ang tawka inbuatsaihin hlim tlang takin kan hmang liam ta ruai ruai mai a. Kan la ngaih em em tur a ni tih hre rengin leh kan la chhui kir leh duh tur a ni tih hre chungin hetiang hian a hriatrengna chu kan han buatsaih ve ta a ni.

1. Y.M.A Golden Jubilee-a lung phun tur lung lian tak mai lak a ni a. He lung lak nan hian THA 83 sen a ni a. He lung hi a rih lam chu 26 Quintals 57 Kilograms 648 grams chiah a ni. Y.M.A Flag rawng ang chiaha cheiin thu tlem ziah a ni a. A tihngheh nan leh chei nan hian pawisa tam tak senral a ni. Hei aia lian YMA Golden Jubilee lung a awm lo niin hriat a ni bawk.

2. Y.M.A Golden Jubilee Week hawnna Serchhip Bazar hmunah neih a ni a, chuta Khuallian chu Pu Pasena, Serchhip Branch Y.MA hruaitu hmasate zinga mi a ni. Tin, Serchhip Branch Y.M.A President leh BDO Pu Ralkhuma leh V.C.P Pu C. Rozinga ten thu tha tak tak an sawi a, an thusawiah kan lawm tlang hle a ni. Tin, Secretary-in Programme leh tul dangte a puan hnuin Khawlai tihfai hnatlang neih nghal a ni a. Tin, In tinah Y.M.A Flag (Car-flag) zar theuh a ni bawk.

3. Y.M.A Golden Jubilee Week chhung zawng hian Serchhip Bazar hmunah Flag leh Theitui zawrh a ni a. Section tinte kan phur tlangin kan hlawk pui em em.

4. Dt 14-6-85 ni chuan Branch Hnatlang koh a ni a. Y.M.A Golden Jubilee Mei det tur siam leh Lungphun cheite thawh a ni a. Kan mei det tur hi Mizorama mei det eng ber tura ruahman a nih avangin a hautak hle a. Thing tam tawk leh Motor ke chhia 20 hman a ni a. Diesel Litre 40 hman a ni bawk a. Heng thil hi tihfel a nih hnuin kan tin darh ta rih a. Tlai dar nga-ah Bazar hmunah kan innghakkhawm vek a, mei det tur kan siamna hmun lamah Khuangpui leh Darkhuang te, Aurinna te nen Naupang pawh tel vekin kan thawk chho ta a. Hal kai hma hian zai leh lam leh hlim em em in nghah a ni a. A hlim thlakin a ropui mep mep ngei mai.

5. He mei dehkai hma hian Halpuah ring lutuk mai hal a ni a. Halpuah hal tur hian Branch Y.M.A Secretary leh 20th Group YM.A Secretary te Tv F. Lalawikunga leh Pu P.C Kapliana te ruat an ni a. Tin, Halpuah hal hma hian Y.M.A Golden Jubilee Hlado Pu T. Rosiama lo buatsaih chu Branch Vice President leh 20th Group Y.M.A Vice President Pu Lalremsiama Kawlni leh Pu K. Zosangliana ten ring deuh maiin an han chham ta mai a, a hre phak chin chu kan mur uai uai mai. Hlado chu hetiang hi a ni.

“Hmatiang e, sawn nan emaw

Lenrual tui ang kan fawn dim e;

Suihlung e, rual nan emaw;

Senmei kan det tlang tin a'n e,

Siamtu e, chung Pathian-in,

Maltin min sawm zel rawh se.”

6. Meipui hal alh a nih hnu chuan tlang hrang hrangah mei a lo de ta chuah chuah a, han thlir velin a hlim thlakin a thlamuan thlak em em hian a hriat a ni. Tin, khaw hrang hrang te kan phur tlangin kan hmanhmawh tlang deuh pawh a ang hle a. Dar sarih hmain Mei a de hnem hle tih han hmuh khan kan phur tlan dan a hriat hle a ni. Section hrang hrang te a tuk lama kan tih turin mi a nawr bawk avangin Programme hran neih loh a ni a. Mahni awmna Veng theuhah kan hmang uar hle hlawm a. Kan meidet kan in en chhawk deuh reng hlawm a, hei hian mipui rilru pawh a chawk tho hle a ni.

7. Kan Y.M.A Golden Jubilee ni ah intihsiak kan tum tlat avangin Section tin ten hla kan zir ngawrh a. Zan tin mai in Veng hrang hrangah kan ri thup thup mai a. Hma kan sawn phahin kan hlim pui em em a ni. Ni 14 tlai-ah chuan Section tinin ran talh tur kan thlung fur hlawm tawh a. Veng thenkhatah phei chuan pahnih/pathumte kan thlung hlawm a. Kan ri hut hut a ni ber mai. Mitin mai hi kan phur surh a ni ber e.

8. Kan ran talh leh sensote chu a hnuaia kan han tarlan ang hi an an ni a. Tih kim loh pawh a la awm hmel viau bawk.

1. Lawi - 1 (pakhat)

2. Sial - 1 (pakhat)

3. Bawng - 6 (paruk)

4. Vawk - 8 (pariat)

5. Varak - 2 (pahnih)

6. Ar - 12 (sawmpahnih)

Herg ran zawng zawng man hi Rs. 35,000.00 a ni a. Thil danga senso zat chu Rs. 4,000.00 a ni bawk a. Kan hriat theih chin zawnga kan senral chu Rs. 39,000.00 a ni.

9. Ni 15-6-85 (Inrinni) Golden Jubilee ni-ah chuan zing dar 6:00 ah Golden Jubilee Flag pawhpharh a ni a. A pawtpharhtu chu Pu C. Thansanga, kan khuaa Y.M.A. lo puluttu a ni a. Hemi a pawhpharh zawh hian kan Branch President nilai mek Pu R. Laldaihzauva'n Y.M.A. Golden Jubilee lung a hawng leh a. He lung hian entu a ngah hle a ni. Tin, kawtlai tihfai hnatlang neih zui leh a ni a. Mahni Veng theuhah kan buai hlawm em avangin kan hnatlang pawh kan tin thuai a. Zing lam Dar 10:00-ah Town Hall-ah hun hman tan leh chiah a ni a. Heta mipui lo kalkhawm hi Mi 4000 vel zet kan ni. Town Hall-a leng lo khawp kan kalkhawm hian Y.M.A hlutzia a tilang em em a ni.

10. Kan inkhawm Pu Lalhmangaiha Chawngthu, Lecturer-in Pathian hnena min hlan sak hnuin thusawi ropui tak tak leh Solo-te a inchhawk reng a. Kan hruaitu hmasate pitar leh putar lo ni tawhte chu chawimawina Pangparthi hlan an ni a. Hemi lo kaihruaitu chu kan Secretary Tv. F. Lalawikunga a ni a. Mi 60 chuang zet kan sawm leh hriattir atangin mi 39 chiah an lo kal a. Heng mite Pangparthi awrhtir hi a hlim thlak hle. Kan V.C.P Pu C. Rozinga leh B.D.O Pu CH. Lalsanga ten thu tha tak tak mi an fah chu mipui leh Y.MA. hruaituten kan lawmin kan hlim pui hle bawk a ni.

11. Hlim tak leh nuam ti taka kan hun hmang zelin Section Zaipawl ho tan Intihsiakna hun a lo thleng ta a. Section tinte zai a tha tlang hle a, Solo Competition pawh neih pah reng a ni bawk a. Hunin mi a daih lo hle a, tlai dar 3:00 ah chuan mahni Section theuhah RUAI theh turin kan tin darh ta rih a ni.

12. Zan lamah Inkhawm zan a nih avangin Inkhawm banah hun neih chauh a ni a. Pu T.Rosiama 20th Group Y.M.A President-in Mizo nun phung leh hmasawnna te a sawi a. Amah a tangin mi a ti phur hle a ni. Tin, chhun lama kan intihsiak results kan Secretary-in a puang a, chumi pahin Pi Laldikkimi C.D.P.O (ICDS) in lawmman semna a nei nghal bawk a. Mipui pawh Town Hall-ah kan leng lo a ni.

13. Hlim tak leh phur tlang em em in kan hun chu a lo liam ta a. A chunga kan han tarlan tak zawng zawngte tipuitling tura tha leh zung Y.M.A taka hlantute chungah kan lawmthu Serchhip Branch aiawhin ka hlan che u. A chhiartu apiang hnenah Y.M.A. Golden Jubilee Hmingin Chibai ka buk bawk che u a ni e.

(Y.M.A. NUNG RENG RAWH SE)