Tun tum anga mahni bial vil tha leh ngaihsak MLA an la awm lo - Dr. R. Lalthangliana

MNF Adviser leh Health Minister Dr. R. Lalthangliana chuan tun tum MLA te anga mahni bial vil tha leh ngaihsak an la awm lo hiala a hriat thu a sawi.

MNF Party in nimin-a Aizawl Mizo Hnam Run-a Chhung Inkhawm an neih ah Dr. R. Lalthangliana chuan Pathian hruainaa harsatna liantham awm lova inthlan zawh a ni ta chu lawmawm a tih thu sawiin, “Politics-a kum 30 bawr ka lo awm ve tawh a, tun tum MLA te anga mahni bial vil tha leh ngaihsak an la awm lo hialin ka hria,” a ti a. MLA chhuanawm tak tak MNF-in an nei tih sawiin, “An bial an vil hneh em em vek mai hi a lawmawm ka ti takzet a ni. Bial vil tha leh enkawl tha MLA an nih angin an bial theuh mipuite pawhin kan MLA te duhsakna an hlan leh ngeiin ka ring a ni,” a ti bawk. MNF Adviser Dr. R. Lalthangliana chuan MNF chu ‘Pathian leh kan ram tan’ titu an nih angin an dah hmasak ber tur chu Pathian a ni tih pawh a sawi a, “Pathian hre chunga hmangaihna, lainatna leh duhsakna nen kan kal a nih chuan Lalpa'n sawrkarna min pe leh em em ang,” a ti bawk.