Sawrkar lakluh dan tur rel

Mizoram Assembly Inthlanpui 2023 neih zawh hnua Mizoram sawrkar thar lo awm tur lakluhna Inkhawm, ‘Swearing-in-Ceremony of Chief Minister and Council of Ministers’ neih dan tur chu nimin khan Chief Secretary Dr. Renu Sharma hovin CS Conference Hall-ah a kaihhnawih Department-te nen sawiho a ni a. Chief Secretary chuan Swearing-in-Ceremony chu programme pawi-mawh tak anih avangin he thilah chanpual leh mawhphurna nei Department ten an tih tur an chian bakah an mawhphurhna te tha tak leh zo taka an hlenchhuah a tul tiin Department aiawhte chu a tha thei ang berin inbuatsaih lawkna te ruahman turin a ngen bawk. He Meeting-ah hian Department hrang hrangte mawhphurna tuk niin an tih tur te thlirho leh sawiho a ni.

Kum 2018 Inthlanpui ah khan December ni 11-ah vote chhiar niin Sawrkar thar chu December ni 15 ah lakluh a nih bakah Assembly thar thutkhawm hmasa ber chu December ni 19 a neih a ni a. Kumin Inthlanpui a mipui thlantlin Sawrkar thar lo piang tur chu December ni 6 leh December ni 15 inkarah lakluh a rinawm a. Sawrkar thar lakluh hnu, Krismas hma ngeiin Mizoram Legislative Assembly 9-na chu a hmasa ber atan an thutkhawm hman beisei a ni bawk.