Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

Thenzawl-ah Food Court hawng

Mizoram State Livelihood Mission (MzSRLM) Serchhip RD Block hnuaia Vantawng Cluster Level Federation hmalaknain nimin khan Thenzawl Hermon Veng-ah khualzin te tana Chaw leh eitur dang ei theihna tur ‘Food Court’ hawn a ni.
Khualzin te tana chaw leh eitur chi hrang hrang, Mizo duhzawng leh khawvel ramdang leh India rama hnam hrang hrang chaw leh eitur siam theihna tur he Food Court hi Serchhip DRDO Project Director HD. Lalpekmawia chuan hawngin hetiang hmun remchang Thenzawl-a hawn a ni chu lawmawm a tih thu leh hemi atana rilru, tha leh zung thawhtute chungah lawmthu a sawi a, tangkai taka Mizoram mipui, zin vei vak te leh State dang leh ramdang atanga khualzin te pawhin an hman a beisei thu a sawi bawk.


DRDO Project Director hian Mary SHG, North Vanlaiphai ten Sunhlu, Dragon fruit, Kawl-thei, Balhla, Theiherawt, Serthlum, Khawmhma leh Lakhuihthei atanga Thei tui (Beer) leh Sunhlu Candy an siamchhuah bakah Chekawn SHG ten Zopui Lemon Squash an siam te chu mipui lei theih turin a tlangzarh nghal bawk.

Vantawng Cluster Level Federation enkawl Food Court hawnna hun hi Vantawng CLF President Ramthianghlimi chuan kaihruaiin Secretary Ngurhmingliani chuan Technical Report a pe a, State Project Coordinator (KS-NRO) Anirban; Serchhip District DRDO DFS Vanlalmuanpuia; APD Stephen Auhmun; Serchhip Block BMM Zodinsanga, Vantawng CLF-a CC Vanlalruata Tochhawng leh Thenzawl VC aiawhin Zothani te pawhin Thenzawl Food Court chu mipui ten tangkai taka an hman an duhsak thu an sawi a ni.

He Food Court-ah hian MzSRLM Sub-Scheme pakhat SVEP hmalaknain Kereal atanga eisiam zirtirtu chah chhuah ten chaw leh eitur chi hrang hrang siam dan zirtirna (training) an lo pe tawh a. Vantawng Cluster Level Federation hnuaiah hian Self Help Group 179 awmin, member 1200 chuang an awm mek a ni.

Comments

Popular News (Last 30 Days)