Mizoram-a Heroin man hnem ber kum thleng mekin kum 2 kalta chhunga man aiin kumin ah man tam tawh
Mizoram Excise & Narcotics Department (END) hian kumin hian July thla thleng khan Heroin hi kg 52.854 an man hman a, July thla thlenga an man hi kum khat chhunga an man tam ber tum ni tawhin hemi hnu pawh hian Heroin tam tham tak man a ni leh tawh bawk a ni. Mizoram sawrkar-a Excise & Narcotics Department hian kum 2015 khan Heroin kg 4.088 manin hei hi kum khat chhunga kg. 4 an man tlin vawi khatna a ni a. Hemi hnu hian ruihhlo hian hluar lam pan zelin kum 2017-ah Heroin kg 6.186 an man leh a, kum 2018-ah kg 8.716 manin kum 2019-ah kg. 12.596 an man leh a, hei hi kum khat chhunga kg. 10 an man tlin vawi khatna niin kum 2020-ah a hma kum aia tlem deuh man mah se kum khat chhungin kg 11.710 an man leh tho a ni.
Hemi hnu lamah hian Mizoram-ah Heroin hi hluar zelin kum 2021-ah kg. 18.906 zet man lehin kum 2022-ah phei chuan kg. 33.418 lai an man a. Hei hi kumin July thla khan khum lehin kumin chhungin July thla thleng khan Heroin kg 52.854 zet an man a, hemi hnu hian man belh zelin kumin chhungin October thlengin kg 74.220 an man tawh a. Kum 2021 leh 2022 chhunga Heroin man zawng zawng aiin kumin October thla thlenga man hi a tam tawh a, thla hnih lai ala awm avangin hei pawh hi la pung leh tura ngaih a ni bawk.
Excise & Narcotics Department-a thawktute chuan Manipur buai hnuah Mizoram-ah Heroin man tur hi nasa taka a pun thu sawiin, Manipur buai nen a inzawm tia sawi ngam chu ni lo mah se an buai hnuah nasa taka a pun thu an sawi a. Manipur hi Mizoram ang bawka Heroin leh ruihhlo chi dang tawlhrukna kawng a ni a, khawchhak lam atanga Manipur kaltlanga tawlh tur kha State chhung buaina an neih tak avangin Manipur-ah luhpui lovin Mizoram lamah an kalpui thin nia rin dan a awm thu an sawi a. Heroin a hluar tih a nih rual hian Mizoram-a an man ah hian ram pawna mi tur a tam thu leh tam thama an man phei chu ram danga mi tur a ni tlangpui tih te an sawi bawk.
Comments
Post a Comment