ZPM chu mipui sawrkar siam tura piang niin sawi

ZPM Working President K. Sapdanga chuan ZPM party chu ZPM sawrkar siam tura piang a ni lo tih sawiin, “Mipui sawrkar siam tura piang a ni,” a ti.

Nimin-a ZPM Chhung Inkhawm Aizawl-a an Party Office-a neih ah ZPM Working President K. Sapdanga chuan he thu hi sawiin, ZPM member te pawh ram siam tura in pe an ni tih a sawi a, “Sawrkarna hi Party Membership atanga siam theih a ni lova, neutral te an pawimawh em em a, ngawi renga sawrkar inrelbawl dan ngun taka lo zir a, an duhna taka vote thlak tute hian sawrkar an siam mai a, hei hi ZPM te chuan kan pawm thlap tur a ni,” a ti.

ZPM Working President chuan Pathian zarah sawrkarna an lo siam a nih pawhin an thutiam-a an din leh din loh mipuiin an buk nghal dawn tih sawiin, “Thuneihna kan lo chang a nih pawhin chu thuneihna dawhkan-a min dahtu chu a bul berah Pathian a nih rualin Pathian in hmanruaa a hman chu mipuite an ni. Chu mite duh dana kan kal lo a nih chuan min paihthla leh theitu chu anmahni bawk hi an ni,” a ti a. “Kan ram damna tur chu in ngaitlawm taka kan tawngtaia Lalpa kan auh leh Ani’n min lo ngaihdamin a ni a, kan inngaihtlawm loh chuan ram damna hi kan thleng dawn lo a ni,” a ti bawk.

Pathian leh mipui zara hnehna an chang ve hlauh a nih chuan an Val Upa Council-te an pawimawh lehzual dawn tih ZPM Working President chuan sawiin, “Anni uapna hnuaiah thianghlim takin mipuite rawng kan bawl theih kan beisei a, eng dinhmun pawh sawisel lova lungawipui turin Candidate te ziakin kan intiam a ni,” a ti bawk.

Comments

Popular News (Last 30 Days)

LPG man bithliah thar