MZP President in Union Minister hnenah thlen

New Delhi-a cham mek Mizo Zirlai Pawl (MZP) General Hqrs. President H Lalthianghlima chuan nimin khan Union Minister of State for Minority Affairs John Barla chu a chenna ah hmuin Mizo zirlaite tana thil pawimawh hrang hrang a thlen.

MZP President chuan MoS Minority Affairs hnenah hian, Mizo zirlai tam tak khawsak harsatna avanga zirna sang zawk chhunzawm thei lo an awm thu thlenin, zirlaite'n Hostel tam zawk Mizoram-ah an mamawh thu a hrilh a. PMJVK Scheme kaltlanga nasa zawka zirlaite harsatna sukiang tura pui tura ngenin, hemi kawngah hian MZP pawhin theihtawp chhuah a zirlaite tan hma an lak thin thu a sawi a, theihtawp chhuahpui turin a ngen bawk a. Mizo zirlaite thiamna leh theihnate haichhuah a nih zel theihna tura zirnaa hma an sawn theih nan an harsatna te sukiang tura hmalak a tul thu pawh MZP President hian Union Minister of State hi a hrilh bawk a ni.

MZP President in nimin-a Union Minister a hmuhna hunah hian Mizoram Rajya Sabha MP K. Vanlalvena pawh telin Rajya Sabha MP chuan zirlaiten hostel an mamawh nasat thu leh MZP chu Mizoram-ah chuan zirlaite eng harsatna zawng zawng buaipuitu an nih thute Union Minister hi a hrilh bawk a ni.