Manipur-ah inrelbawlna hran ngiat zel

Kuki-Zo te tana Manipura inrelbawlna hran ngiatin nimin khan ramchhunga khawpui leh thingtlang khaw hrang hrang 26-ah kawngzawh neih a ni.

He kawngzawh hi Zo United huaihawt niin mipui pungkhawm te chuan Manipur-a buaina chu inrelbawlna hran an neih chauha chinfel theih a nih thu te, Meitei sawrkar an duh loh thu te leh Tribal Area a sawrkar hran an duh thu bakah buaina chinfel vat a nih loh chuan an chawlhsan dawn loh thu te in an aurual a. Kuki-Zo hnam te chuan thla 7 chhung tihduhdahna hrang hrang an tawrh tawh thu leh Kuki leh Zo te tana Meitei sawrkar enkawl Manipur State chhungah ngaihngam taka nun hman chu beisei chi pawh a nih tawh loh thu an sawi a ni.

Zo United te hian nimin khan sawrkar laipui Home Minister Amit Shah hnenah Memorandum thehlutin Kuki Zo te tihduhdaha an awm chu thla 7 lai a nih tawh thu leh he buaina hi Manipur Chief Minister N. Biren Singh leh a thawhpui hrang hrangten fing taka an ruahman a nih thu an tarlang a. Kawng hrang hranga Kuki-Zo te rahbeh an nih dan tarlangin, Manipur khawpui Imphal atanga Kuki Zo mipuite hnawhchhuah an nih avanga zirna, eizawnna, damlo enkawl leh thil hrang hrang hranga harsatna awm te, State sawrkar leh dan kengkawhtu Police te Meitei te lama an tan tlat avang leh Tribal mipuite hmasawnna tur sum hrang hrang a dawngtu turte hnen a thlen theih tak loh avangtein inrelbawlna hran chu hmanhmawhthlak takin an mamawh tih te an tarlang a ni.