PWD Serchhip Division in sawrkar kum kal mekah cheng nuai 54 sengin hna paruk an thawk tawh

PWD Serchhip Division chuan sawrkar kum kal mek 2023-2024 ah Maintenance Action Plan atanga cheng nuai 54 an hmuh hmangin hmun hrang hrang 6-ah kawngpui siamthat hna an thawk tawh.
PWD Serchhip Division-a Sr. Executive Engineer, Er. Zirsangliana chuan nimin khan LENKAWL zawhna chhangin kumin hian Maintenance Action Plan hnuaiah cheng nuai 54 an hmuh hmangin hna an thawh thu a sawi a, he sum hmanga hna paruk (6) an thawh tawh thu leh heng zinga pali (4) te chu Serchhip khawpui chhunga mi a ni tih sawiin, Meter 850-a thui Serchhip Bazar atanga Vengchung panna kawng te; Meter 225-a thui NH. 54 atanga Serchhip Town Hall panna kawng leh a tual zawl te, Meter 180-a thui Serchhip Dinthar Veng-a Presbyterian Kohhran Biak In panna kawng te chu an siam zawh tawh thu a sawi a. Tunah hian NH. 54 atanga Serchhip DC Office panna kawng leh a kawtzawl te chu siam tura ruahman mek a ni tih pawh sawiin, he hna hi kar hmasa lama tan tura ruahman ni mah se ruah a sur avanga an tan tak loh thu leh nimin lam khan hna hi a bul tan tura an in ruahman thu a sawi a. He hna pawh hi hun reilote chhunga zofel tura an in beisei thu a sawi bawk. Heng bakah hia Chhingchhip-ah Meter 820-a thu leh Khumtung-ah Meter 700-a thui kawngpui siamthat hna an thawh thu a sawi bawk.


PWD Serchhip Division-a Sr. EE chuan nikum lama kawngpui siamthatna tura sum an hmuhna, SEDP hnuaiah kumin hian sum hmuh an nei lo tih sawiin, SASCI hnuaiah erawh sum hmuh an inbeisei mek tih a sawi a. SASCI hnuaiah hian hna pathum thawh tura ruahman a nih thu leh hemi atan hian cheng nuai 15 hmu tura an inbeisei thu sawiin, heta tang hian cut tur hrang hrang paih a nih hnuah Rs. 12,71,186.57 hmangin hna thawh a ni dawn tih a sawi a. Hnathawh tura ruahman zingah hian DFDO Office leh BDO Office panna bakah Serchhip Hmar Veng-ah pakhat a awm thu a sawi a. Heng sawrkar atanga sum an hmuh bakah hian khawtlang leh pawl ten sum an thawh hmangin hmun hrang hrangah kawngpui siam hna hi an thawh thu a sawi bawk.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man