Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

Assembly Inthlanpui-a Vote tla te chhiar turin Serchhip District a inpeihfel thawkhat tawh

Mizoram Legislative Assembly Inthlanpui-a Serchhip District huamchhung Assembly Constituency pathuma vote tla te chhiar tura inbuatsaihna te chu nimin khan District Election Officer David Lalthantluanga hovin thlihro a ni a, Vote chhiar tura inbuatsaihna hi peihfel thawkhat a ni tawh a ni.

Serchhip District Bawrhsap leh District Election Officer David Lalthantluanga hova a Office Chamber-a thutkhawm neih ah hian Bawrhsap chuan Inthlanpui-a Vote tla te chhiar tura inkaihhruaina siam hrang hrangte a theih anga bawhzui a nih tawh thu sawiin, he thutkhawm a tel Serchhip District chhung Assembly Bial pathum-a RO leh ARO bakah mawhphurhna hrang hrang nei te chu hun tlemte chauh theihtawp chhuah turin a chah a. Hemi hnu hian Serchhip Election Officer Lalrinsanga Hnamte chuan Vote chhiar tura inbuatsaihna hrang hrangte a tarlang bawk.


He huna tarlan a nih danin Serchhip District chhunga Assembly Constituency pathum - 26-Serchhip, 27-Tuikum leh 28-Hrangturzo Bial tan Counting Hall pakhat theuh ruahman a ni a. Serchhip DC Conference Hall, DC Meeting Hall leh E-District te chu ECI kaihhruaina leh duhdan anga cheithat niin, peihfel thawkhat a ni tawh a. ECI duhdan angin Counting Hall chhungah hian CCTV vuah vek a ni bawk. Hall chhungah hian EVM a vote tla te chhiarna tur dawhkan pariat theuh siam a ni a, Postal Ballot chhiarna tur pawh ruahman niin Postal Ballot hi Dawhkan pakhat ah 500 zel chhiar tur a nih avangin Serchhip Constituency tan Dawhkan pahnih ruahman a ni a, Tuikum leh Hrangturzo Constituency tan Dawhkan pakhat ve ve dah a ni a, VVPAT chhiarna tur a bika hung hran (enclosure) pakhat dah vek a ni bawk.

Vote chhiarna ah hian venhimna khauh tak ruahman niin venhimna hi thuah thum-a kalpui a ni dawn a, Official duty tur zawng zawngte leh Candidate/Counting Agent te chu Identity Card keng theuh tura hriattir an ni a. Phalna nei lo tan Counting Hall chhung hi luh khap tlat niin Observer, RO leh ARO te chauhin Counting Hall-ah Mobile Phone an keng lut thei dawn a. Vote chhiar ni hian Serchhip DC Office tual-ah lirthei tlanluh phal a ni dawn lo a, Penial Kohhran Biak In bul-a Gate thar siam pawh Vawiin hian peihfel hman beisei a nih thu tarlan a ni bawk.


Election Commission of India in phalna a pek Authority Letter nei chanchinbu mite tan Counting Hall bulah Media Centre siamsak an ni a, hetah hian inbiakpawhna atana mamawh hmanrua te chhawpin Media Centre atang hian Round tina vote tla chu mipuite hriat turin aurinna hmanga puanchhuah a ni anga. Candidate te leh an Agent te pualin Public Communication Room siam a ni dawn bawk a. Media ten candidate te interview an neih pui theihna tur a bika hmun ruat Interview Booth/Podium for Candidates siam a ni dawn bawk a ni.

Inthlanpui-a Vote tla te chhiar tura ruat, Counting Official te tan Training vawikhat buatsaih a ni tawh a, a thawh hnihna hi December ni 1-ah neih leh tura ruahman a ni a. November 23 khan First Randomization neih niin, December ni 2-ah Second Randomization nei lehin December ni 3, 2023 zing dar 5:00-ah 3rd Randomization neih a ni dawn a ni. December ni 3, 2023 zing dar 8:00-ah Postal Ballot chhiar tan a ni ang a, EVM-a vote tla te hi zing dar 8:30-ah chhiar tan a ni ang.

Nimin-a thutkhawm ah hian Serchhip SP MS. Dawngkima RO leh ARO, Serchhip DIPRO leh P&E Department-a Sr. Executive Engineer te an tel a. Vote chhiar ni-ah Power Supply a khaihlak lohna tura hmalak dan tur te, Observer te lo dawnsawn dan tur leh inthlan kaihhnawiha buaipui ngai la awm te sawiho a ni a. Thutkhawm neih zawh a nih hnu hian Bawrhsap ho hian Vote chhiarna tur hmun hrang hrangte hi a hmunah tlawhin an enfiah nghal bawk a ni.

Comments

Popular News (Last 30 Days)