Mipa ten Hmeichhiate atangin zir tur kan ngah - Ruatkima

Aizawl West-II Bialtu MLA Lalruatkima chuan Mizo mipate'n chak lo zawka kan ngaih hmeichhiate atangin kawng hrang hrangin zir tur kan ngah tih a sawi.

MLA Fund Rs. 5,51,934/- leh AMC Deputy Mayor R. Thanglura Fund hmanga sak Tuikual South MHIP Building hawnna nimin-a neih ah Aizawl West-II bialtu MLA Lalruatkima chuan chhungkuaa dinhmun pawimawh tak chelhtu chu hmeichhia an ni tih a sawi a, “Tunlai hian hmeichhia leh mipa kan in tam hleih ta hle a. Death Rate en pawhin mipa kan thi nasa em em mai a, hei hi a pawi takzet a ni,” tiin kan hriselna lam thuah pawh Mizo mipate kan inenkawl uluk lehzual a ngai hle tih a sawi a. “Eizawnna leh sumdawnna lamah pawh Mizo hmeichhiate indaihzai ta hle a. Khawiah nge Mizo mipa kan awm tak? tih tur hial a ni ta a ni,” tiin “Mizo mipate'n chak lo zawka kan ngaih hmeichhiate atang hian kawng hrang hrangin zir tur kan ngah a. Taihmakna, tumruhna, teirei peihna leh kawng hrang hranga Mizo mipaten hmeichhiate kan entawn a ngai ta hial zawkin a lang a ni,” a ti bawk.

Lalruatkima chuan Mizoram-ah NGO tha tak tak kan nei tih pawh sawiin, “Sawrkar leh Kohhran te nen NGO hi tangtlangin Zoram tan an tangkai takzet a. Heng lungthu pathum avang hian kan ram leh Hnam leh Sakhua pawhin a him phah a, hripui len lai pawhin an tanrual that zarah kan damkhawchhuak thei a ni,” a ti bawk.