Serchhip District-ah Two Wheeler Taxi Permit 162 pe tawhin permit dilna hun a hrana siam a ni lo

Serchhip District-ah Two Wheeler Taxi Permit dilna 211 lut tawhin Permit 162 pek a ni tawh a, Two Wheeler Taxi Permit dilna thehluh hun hi a hran a siam a ni lo thung.
Mizoram State Transport Authority (STA) thutkhawm March 23, 2021-a neih in a rel angin Serchhip District chhunga khaw pahnih, Serchhip leh Thenzawl-ah te Two Wheeler Taxi hi tunhnai atang khan an Service tan a, Two Wheeler Taxi service tur hian zirchianna neih hmasak niin Serchhip District Deputy Commissioner kaihhruaina hnuaiah DTO, NGO leh Commercial Vehicle Association te chuan Permit pek dan tur rel ho hmasa lehin hemi hi Nov. 15, 2021-a STA Meeting chuan a thlir nawn leh hnuah hmalakna kalpui a ni a. Serchhip-a District Transport Officer (DTO) Office atangin Serchhip District chhunga khaw 23-a mi te hnenah Two Wheeler Taxi Permit hi pekchhuah ni tawhin heng zinga 134 te chu Serchhip-a Service tura permit hi pekchhuah niin a dang te hi Thenzawl-a Service tura pekchhuah an ni thung a. Serchhip bikah hian tun thlengin Two Wheeler Service hi 34 awm tawhin heng mite tan hian Serchhip khawpui chhung hmun panga (5)-ah Stand pek an ni tawh a, mipuite tan pawh a tangkai chho viau rih nia thudawn a ni.


Two Wheeler Taxi permit pek te hi Permit pekchhuah an nih atanga thla ruk (6) chhunga lirthei register vek tura tih an ni a,Two Wheeler Taxi atan hian lirthei ke hnih nei 125CC aia hniam lo, lirthei thar hlak (Brand New), eng Company siam pawh hman theih a ni.

Serchhip District chhunga Two Wheeler Taxi service chungchanga RTI hmanga zawhna Transport Department-a Department Appellate Authorities (DAA) in a chhanna a tarlan a nih danin District hrang hrang leh Thenzawl-ah te Two Wheeler Taxi service tir tur hian March 23, 2021-a STA Meeting chuan relin hemi chungchang hi Newspaper hrang hrangah puanzar a ni a. Two Wheeler Taxi permit pekchhuah te hi STA in a rel dan anga pekchhuah thin niin a hranpa in mipuite hnenah puanzarna a awm lo a ni.

Two Wheeler Taxi permit dil theih hun hi hawn a nih leh nih loh chungchanga zawhna pawh chhangin, “Permit mamawh tute chuan thuneitute hnenah dilna an thehlut mai thin a. Dilna thehluh hun hi a hranpa in siam a ni lo,” an ti a. Serchhip District-ah Two Wheeler Taxi Permit dilna 211 a luh tawh thu leh permit 162 pekchhuah tawh a nih thu RTI zawhna an chhanna ah hian tarlan a ni bawk.

Comments

Popular News (Last 30 Days)

Vawiin-ah HSSLC Exam result