Serchhip District-ah Myanmar atanga raltlan 343 awm mek

Serchhip District chhungah Myanmar atanga raltlan rawn lut mi 343 an awm mek nia chhinchhiah a ni a, tunhnaia Myanmar buaina chhuak thar leh ah raltlan rawn lut tam vak lo an awm belh nia thudawn a ni.
Serchhip DC Office atanga thu kan dawn danin tun dinhmunah Serchhip District-ah khua/VC 19-ah Myanmar atanga raltlan rawn lut hi awmin heng raltlan te tan hian Relief Camp buatsaih a awm lo a, raltlan awm mek zinga 109 te hi mipa niin hmeichhia 83 an awm a, kum 18 hnuailam mi 151 an awm bawk a, heng raltlan te hi Relief Camp pawnlam-a awm vek an ni.

Tunhnaia Myanmar tualchhung buaina chhuak avanga inkahna thleng thar leh ah raltlan rawn lut hi an awm belh leh nia thudawn ni mah se tunhnaia rawn lut thar hi a hrana chhinchhiah a ni lo thung a. Serchhip khawpui chhung bikah raltlan hi 210 awmin Veng mal-a an tamna ber Chhim Veng-ah mi 93 lai an awm a. Thenzawl-ah mi 40 la awmin Chhingchhip Mualpui-ah 30, Leng-ah 27, North Vanlaiphai-ah 12, Bawk-tlang-ah 6, East Lungdar-ah 5, Hualtu-ah 4 leh Baktawng, Sailulak leh Vanchengte-ah mi 3 theuh an la awm nia chhinchhiah a ni.

Hetihlai hian Manipur-a tualchhung buaina thleng avanga Serchhip District-a raltlan rawn lut erawh tunhnaiah chhinchhiah belh an awm rih tawh lo tih DC Office-a thawktute chuan an sawi a, mi engemaw zat chu Manipur-ah hian an let leh tawh bawk nia thudawn a ni.