Mizoram boruak a bawlhhlawh chak in AQI ah Level 3 thleng tih MPCB hotuten an sawi

Mizoram boruak chu a bawlhhlawk chak hle a. Boruak bawlhhlawh leh bawlhhlawh lo tehna, Air Quality Index-ah a san lai berin 216 a thleng a, hei hi fimkhur ngai tak, rei tak hip luha thawk tiharsa thei a ni.

Mizoram Pollution Control Board thawktute chuan tunhnaiah Mizoram boruak a bawlhhlawh zualin khua pawh kum kalta aiin a lum zual hle nia sawiin, boruak bawlhhlawh dan leh khawchin ngun taka a zirchian thinna atanga a lan danin khawpui boruak a bawlhhlawh nasa chho hle mai a, chu chuan sik leh sa ah nghawng neiin khua pawh a lum zual hle niin an sawi. MPCB thawktute chuan kumin chhung ringawt pawhin Thal laia Mizoram boruak chu a bawlhhlawh chak hle a, boruak bawlhhlawh dan tihlanna, AQI-ah Aizawl khawpui chu January thla khan AQI 65 a ni a, February leh March thlaah 85 kai chhoin April 10 atang phei kha chuan 100 chung lam kaiin 150 bawr velte a ni chho ta a, a san ber lai phei chuan 216 a kai pha hial tawh niin an sawi a. Nikum lam nen khaikhinin AQI hi a sang chho nasa hle tih sawi bawkin nikumah a san ber laiin AQI hi 104 a nih laiin tun kumah chuan 216 a kai niin an sawi a. “Tunhnaia Mizoram boruak dinhmun hi AQI zat atanga en chuan Level-3 (moderately polluted category)-ah kan awm mek a, tun hma lam chuan a tlangpuiin ‘good category’ a awm thin kan ni a, engemaw lai phei chuan khawpui boruak fai ber nihna pawh kan hauh a, tunah erawh chuan a bawlhhlawh chak ta hle a ni,” an ti a. Boruak bawlhhlawh chhan chu motor pun chak vang te, bawlhhlawh hal leh lo hal, ram kang thleng vang te niin an sawi.

AQI Range-ah hian 0-50 ah chuan harsatna thleng meuh lovin 51-100 ah chuan Mi awmnem deuh tan thawk harsatna a thlen a. 101-200 ah chuan Chuap/lung natna nei, naupang leh upa tan thawk harsa in 201-300 ah chuan rei tak hipluh chuan thawk a ti harsa a. 301-400 ah chuan thawkna kaihhnawih ah harsatna thlengin 400 chunglam ah chuan mi hrisel pangngai pawhin an tuar tawh niin an sawi bawk.

Nikum lam nena khaikhinin khawlum dan pawh a danglam chho nasa hle tih sawi bawkin, “Nikum April thla khan a lum lai berin 27.24°C a ni a, kumin April thlaah erawh chuan 34.16°C a kai tawh a. Nikum lam nen a san ber lai inthlauhna hi 6.92°C lai a ni tawh tihna a ni,”an ti a. Mizoram Pollution Control Board Secretary C.Lalduhawma chuan Mizoram boruak chu bawlhhlawh chho deuh mahse mipui ten tan kan lak chuan a la hlauhawm lutuk lo tih sawiin, “Mizoram kan vanneihna chu ruahtui kan dawng tha a, hei hian boruaka bawlhhlawh cham tur kha a tibo a. Thal-ah erawh ruah a awm loh avang leh lo hal, lirthei khu leh ramkang vangin AQI ah kan sang thin a ni,” a ti a. Boruak bawlhhlawh leh bawlhhlawh loh tehna Ambient Air Monitoring Station, tuna Sikulpuikawn (Aizawl) a awm mek chu lei belhin District khawpui leh Census Town remchangah te bun an thu a sawi a bawk a ni.