China-a Pneumonia leng zirchian mek niin India tan hlauhthawn tur a awm rih lo niin a lang

Health Department hotute chuan tunlaia China rama Pneumonia hri leng chu zirchian mek a nih thu sawiin, tun dinhmunah India ram tan hlauhthawn tur a awm leh rih lo nia a lan thu an sawi.

Nimin khan Health Department-a Principal Secretary Esther Lalruatkimi leh Special Secretary Vinay Kumar te hovin Aizawl-a SAD Conference Hall-ah tunhnaia China rama Pneumonia hri leng mek chung-chang leh he hri leng laka Mizoram a him theihna tura hmalak tulte sawiho a ni a. He thutkhawm ah hian Health Department Principal Secretary Esther Lalruatkimi chuan China rama Pneumonia hri leng vanga nausen thi an awm thu sawiin, sawrkar laipui-a Ministry of Health & Family Welfare lamin a tul anga lo inpuahchah tura hriattirna an tihchhuah avangin Mizoram lam pawh kan lo inbuatsaih a ngaih thu a sawi a. Ministry lam atanga lehkha rawn kalah pawh tun dinhmunah chi-ai na tur a awm loh thu an ziak tih sawiin, mipuite chu chi-ai lo turin a chah nghal a. “Hmalam hun hriat lawk a nih loh avangin kan phak tawk chin-a lo inbuatsaih hi a pawimawh a ni,” a ti a. COVID hripui len laia inkaihhruaina dan te kha fimkhur thil ah zawm tur chin te ngaihtuah a, Health Sector-a thawktute dinhmun leh damdawi, hmanraw neih te lo in hrechiang tura hriattirna dawn a nih thu a sawi bawk.

Health Department hotute chuan China rama Pneumonia hri leng chu zirchian mek a nih thu sawiin, tun dinhmunah India ram tan hlauhthawn tur a awm leh rih lo ni a a lan thu an sawi a, chutih rualin inthlahdah chuang si lova India ram chhung, a bikin Mizoram hnaih State hrang hrangte dinhmun thlithlai reng a tul thu an sawi a ni. Nimin-a thutkhawm-ah hian Health Department hnuai thawktu hrang hrangte dinhmun bakah damdawi In hrang hrang, hmanraw neih te leh damdawi kawl mek te dinhmun sawiho a ni a, a tul anga inthuam chak dan turte rel a ni bawk.

Kumin October thla a China hmar lama Arva pul hri (H9N2) leng, a naupang lamin an kai tam chungchang hi India sawrkar chuan ngun takin a thlitlai reng a, State leh UT zawng zawngte chu Covid-19 hri len laia fimkhur tura inkaihhruaina ang te hmang tura ngenin, Naupang leh tleirawl lam hritlang awmna ang chite chik ngun tura hriattir an nih bakah Union Health Ministry chuan State leh UT-te chu mipui hriselna dinhmun ennawn turin a hriattir a, damdawi In lam inbuatsaihna pawh thlirlet turin a chah bawk a ni.