Tunhnaia pawisa lem man ah Rs. 500 note tam

Kum 2019 atanga kumin 2023 thlengin Mizoram-ah pawisa lem (Fake Indian Currency Note/FICN) Rs. 1,69,14,100 hu man a ni tawh a, pawisa lem man hnem ber chu Rs. 500 note a ni.

Home Department-in a tihchhuah, Achievement Report (2018-2023)-a tarlan a nih danin kum 2019-ah pawisa lem man chungchangah thubuai panga (5) ziahluh niin mi pakua man an awm a, hemi kuma pawisa lem mante chu Rs. 2,000 note piece 2,664, Rs. 53,28,000 hu leh Rs. 500 note piece 2,864, Rs. 14,32,000 hu niin, a vaiin Rs. 67,60,000 hu a tling.

Kum 2020-ah pawisa lem man awm lovin kum 2021-ah Rs. 500 note piece 2,390, Rs. 11,95,000 hu man a ni a, thubuai pahnih ziahluh niin mi panga man an awm a. Kum 2022-ah Rs. 2,000 note piece hnih, Rs. 4,000 hu, Rs. 500 note piece 11,871, Rs. 59,35,500 hu, Rs. 200 note piece 1,507, Rs. 3,01,400 hu leh Rs. 100 note piece 1,502, Rs. 1,50,200 hu, a vaiin Rs. 63,91,100 hu man a ni a. Thubuai pasarih ziah luh awmin mi 10 an man bawk a ni.

Kum kal mek, 2023 chhungin pawisa lem man kaihhnawih ah thubuai pahnih ziahluh ni tawhin, mi pali man an awm a, Rs. 2,000 note piece 1,010, Rs. 20,20,000 hu leh Rs. 500 note piece 1,096, Rs. 5,48,000 hu man a awm leh tawh bawk a ni.