Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

Serchhip District-a NH. 54 laihzauh hna kal mek Bawrhsap in a hmunah kalin a enfiah

Serchhip District Bawrhsap leh NH. 54 laihzauh leh siamthat hna thawh mekah Competent Authority for Land Acquisition (CALA) David Lalthantluanga chuan nimin khan NHIDCL te hmalak dan enfiahin, zangnadawmna dawng tawh zingah In leh lo la thiat lo te chu an thiah loh chhan te a hmunah tlawhin a endik bawk.

Serchhip District Bawrhsap hian nimin khan Chhingchhip Venghlun VC Area leh Mualpui Chhingchhip VC Area bakah Chhiahtlang North leh South VC Area te tlawhin National Highway-54 kawngpui laihzauh leh siamthat hna thawh meka kawngpui enkawltu NHIDCL te hmalak dan a enfiah bakah zangnadawmna dawng tawh zingah In leh lo la thiat lo an awm leh awm loh bakah a la thiat lo ten an thiah loh chhan te a hmunah a enfiah a. Bawrhsap hi Chhingchhip leh Chhiahtlang-a National Highway Monitoring Committee Member te chuan tawiawmin kawngpui laih meka harsatna awm te leh khawtlang mipui lam mamawh te an lo thlen a. Bawrhsap David Lalthantluanga chuan an thuthlente tha taka lo dawngsawngin danin a phal chin ang zela hmalak pui a tum thu a sawi a. Khawtlang leh ramin hma a sawnna tur leh kawngpui tha kan neih theihna tura sawrkar hmalakna te tawiawm tura mipuite chu sawmin, Kum thar March thla tawpah kawngpui hi hawn hman ngei tum a nih avangin hmanhmawh taka hmalak a tul thu a sawi a, “Theihtawpin i tang tlang ang u”, tiin mipuite chu a ngen bawk a ni.


National Highway-54 kawngpui laihzauh leh siamthat hna thawh mekah hian Serchhip District huamchhungah sawrkarin ram a lak fel tawh leh zangnadawmna dawng tawh zinga za zela 93 (93%) chuan an In te an thiat fel tawh a. Amaherawhchu, chhan hrang hrang avangin zangnadawmna la tawh zingah mahni In la thiat ve lo te an awm tih hriat a ni a. Kum 2018 leh 2019 khan District Bawrhsap leh CALA chuan 3D Notification tichhuakin zangnadawmna dawng turte hi chiang takin a lo tarlang tawh thin a. Heng mi te hian zangnadawmna an dawn fel tawh avangin an ram te hi sawrkarin dan angin neitu nihna a nei fel tawh a, tluang taka hna thawh chhunzawm a nih theih nan huntiam chhungin mahni In thiat fel vek tawh tura beisei an ni a. Zangnadawmna la tawh zingah In thiat lo an la awm avangin kumin July leh August thla khan Magistrate ten an In-ah ngei kalchilhin an In te thiat tura thupek, Eviction Notice pawh pek an lo ni tawh bawk a ni.

Sawrkar thuchhuah tarlan danin Eviction Notice dawngtute hian thupek zawm lova an In te an lo thiat lo a nih chuan sawrkar chuan dan anga hmalain IPC Sec 188 tlawhchhana thubuai siam sak an ni dawn a. Hetiang thil hi a thlen lohna turin zangnadawmna dawng tawh, Eviction Notice dawng tawh zingah mahni In leh lo thiat lo an la awm chuan DC chuan thiat vek turin mipuite a chah nawn leh a ni.

Serchhip District Bawrhsap David Lalthantluanga hian nimin-a hnathawh mek a enfiahna ah hian Chhingchhip leh Chhiahtlang khaw chhungah hmun engemaw zat a tlawh a. Khaw dang te pawh hun remchang hmasa berah tlawh chhunzawm tumin Sawrkarin dan leh thupek lek kawh a, thubuai siamsak kher an ngaih lohna turin a rang lama an In te lo thiat fel turin mipuite a ngen a ni. 

Nimin-a heng hmun a tlawhna ah hian District Bawrhsap hi sawrkar lam atangin Addl. DC Lalnundika bakah PMU-Seling General Manager te pawhin an tawiawm a ni.

Comments

Popular News (Last 30 Days)