Lenkawl

Mizoram Tourism Department chuan Delhi-a hmunpui nei Consultant pakhat chu uchuak taka a duhsak avangin cheng vbc. 2.41 zet a luan ral tir niin Comptroller and Auditor General (CAG) of India report thar ber chuan a tarlang.

India Today Group in State of the State's Survey nei-a Category hrang hranga India state te lawmman a pek thin chu kumin atan Zirtawpni khan sem a ni leh ta a, he lawmman semna New Delhi-a neih ah hian Mizoram chuan 'Best Performing Small State in inclusive Development and Environment' leh 'Most improved Small State in Economy, Health and Tourism' lawmman a dawng a. Mizoram aiawhin he Award hi Ajay Chaudhry, IPS, New Delhi Resident Commissioner chuan a dawng a ni.

Vanbawng lal hnuhnung ber, Lallula Sailo s/o Liankiauva chu Inrinni zan khan Aizawl Ramthar Veng-a an chenna In-ah a boral a, kum 91-a upa a ni. Lallula Sailo hi March ni 28, 1928-ah Vanbawng-ah a piang a, unau pariat niin kum 1947 khan a pa a boral avangin Van-bawng-ah hian a lal a, kum 1954-a lal ban a nih thlengin Vanbawngah ro a rel a ni.

Directorate of Agriculture (CH) Mizoram buatsaihin Zirtawpni khan Serchhip-a DAO Office Training Hall-ah Soil Health Card Scheme and Soil Sample Collection Technique chung-chang zirhona neih a ni.

Zoram Thar Executive Committee in khaw-vel pum huap Zofate Insuihkhawmna rorelna Inpui tur, Zofate Lairelna (Zofate Committee) an din hnuah Zirtawpni khan 'Serchhip District Zofate Lairelna' chu din a ni.

Health and Family Welfare Minister, Dr. R. Lalthangliana chuan Inrinni khan Champhai District Hospital-ah Dialysis khawl leh ICU tenau an tih mai, High Dependency Unit (HDU) chu a hawng.

Human Resources Development Board Vice Chairman, L. Thangmawia chuan Federation of Mizoram Samagra Employees (FEMSE) in nawrh an huaihawt chungchangah sawrkarin an thilngiat engmah a la dawng lo niin a sawi.

Serchhip leh Hriangtlang inkar kawng siam meka lung la-a inhlawh Lalremruata (21), New Vervek khua chu nimin khan Serchhip leh Hriang-tlang inkar-a Tuikum lui-ah chesualin tui-ah a tlahlum.

India rama Governor leh Lt. Governor te intawkhawmna, Conference of Governors vawi 50-na chu Inrinni khan New Delhi-a Rashtrapati Bhavan-ah President Ram Nath Kovind chuan a hawng a. He hunah hian Mizoram Larsap, PS. Sreedharan Pillai chuan Tribal te harsatna tawh hrang hrang te sawiin, Tribal te dinhmun chawikanna atan rawtna a thlen.

Excise & Narcotics Department-a Officer te chuan nimin khan Crime Review Meeting an nei a. Mizoram Sawrkar-in Zu khapna leh khuahkhirhna Dan a kalpui mek laiin Mizo mipuite nen thawhhona tha lehzual an ngen tih an sawi a.

Food, Civil Supllies and Consumer Affairs Minister, K. Lalrinliana chuan Bairabi-ah tuialhthei chhek khawlna, Oil Depot leh eirawngbawlna Gas thun khahna, Bottling Plant lian din tura hmalak mek a ni tih a sawi.

Mizo Academy of Letters (MAL) chuan nimin khan Central YMA Hall, Tuikhuahtlang ah Annual Meeting neiin Lalthangfala Sailo hnenah Mizo Academy Award 2019 hlan a ni.

PRISM Party chuan MLA te hlawh tihpun chu hun an tih loh thu sawiin, MLA thenkhatin an hlawh an tihsan chhana mipui an puh chu demawm an tih thu an sawi.

Land Revenue & Resettlement Minister, Lalruatkima chuan Assam Rifles sawnchhuak tura sawrkar hmalakna chuan rah tha a chhuah mek tih sawiin, ramri ti chiang ngam sawrkar Mizoram mipuiin an nei chu thil lawmawm tak a nih thu a sawi bawk.

Mizoram Truck Driver Association chuan Mizoram Carrying Contractor Association chu miretheite rapbettu nia sawiin, an Buhfai an phurh sak theih tawh loh tur thu thuchhuah siamin an tarlang.

Home Department-in ruihtheih thilin a tih-buai Police-te puala chawlhkar hnih (2) chhung intuaitharna a buatsaih chu nimin khan Thenzawl PTS Conference Hall-ah khar a ni.

Mizoram sawrkar chuan nimin khan thuchhuah siamin Mizoram-a District Education Officer (DEO) leh Sub-Divisional Education Officer thenkhat te awmna a siksawi a. Serchhip DEO nilai Lawmawma chu Mamit-ah DEO hna chelh tura sawn niin a aiah hian Lawngtlai DEO ni lai, Zohmangaihi chu a rawn awm dawn thung a, he Order chhuah atanga ni 15 chhunga an hna zawm tura tih an ni bawk.

Mizoram Upa Pawl (MUP) District Hqrs. Serchhip chuan Serchhip Bazar-a an Office-a dah tur TV tha tak chu RV Enterprise neitu, R. Lalkohbika te chhungkua chuan a thlawhna an pek thu leh lalro Digital neitu, Vanlalchhunga ten a thlawna connection an pek thu sawiin, an chungah lawmthu an sawi tak meuh meuh tih an sawi bawk.

Serchhip District tlawha rawn zin MJA General Hqrs. hruaitute leh MJA Serchhip District Member te chuan nimin khan Serchhip Zawlpui phai-a Fisheries Department hmalakna hrang hrangte a hmunah an tlawh.

Nimin-a Mizoram Legislative Assembly Thlasik thutkhawmah Parilaimentary Affairs Minister, TJ. Lalnuntluanga putluh MLA-te hlawh sanna tura Bill pawm a ni a. Tun hi kum 1987-a State puitlinga Mizoram hlankai a nih hnuah MLA hlawh ennawn tum 4-na a ni.