Politics-ah insawichhe tawn leh thu awmze nei lova inbei chiam chiam lovin a kal theih - Speaker

Mizoram Legislative Assembly Speaker Lalbiakzama chuan Politics-ah insawichhe tawn leh thu awmze nei lova inbei chiam chiam lovin a kal theih tih a sawi.

Young Indians Mizoram buatsaih ‘Young Indians Parliament, 2026’ chu nimin khan Aizawl-a Assembly Annexe Conference Hall-ah neih niin he hun hi Assembly Speaker Lalbiakzama chuan khuallian niin a hmanpui a, Young Indians, Mizoram-te'n Young Indians Parliament an buatsaih chu lawmawm a tih thu sawiin, Politics khawvelah India ramah kum naupangten hmun an chang tam lo hle tih a sawi a, “Kum 35 chin tan President a nih theih laiin President ni tawhte kum chawhrual chu kum 71.4 a ni a, kum 40 mi a niha Prime Minister ni thei Rajiv Gandhi bak kha chu Prime Minister naupang tak kan la nei lo bawk a, chutih rualin Mizoram-ah pawh thalaite hi kan lang lo hle a, kan Chief Minister neih tawhte kum chawh rual chu kum 56 vel a ni,” a ti.

Ram dang ang bawkin Mizoram-ah thalaite an tam zawk hle tih pawh Speaker chuan sawiin, “Nimahsela politics ngaihven lo anga sawi kan ni fo thin a. Chutiang tur ting chuan politics hi kan ralthlir thin reng em tih pawh ngaihtuah theih tak a ni a, a tam zawk hi chuan a chhunga tel emaw luhchilh emaw kan tum lo a, kan zir chiang taima tawk lo bawk,” a ti a. Hei vang hian a nawlpui in kan ram politics sukthlek kan hre lo hle tih pawh sawiin, “Thawkkhat lai phei kha chuan politics hi 'sual' ang thawthang ah kan ngai emaw tih mai tur a ni a, Kohhran Upa leh Kohhran mite tel vena tlak lo ang hiala ngaih hunlai kha a awm,” a ti bawk.

Assembly Speaker chuan kan duh emaw, duh lo emaw kan ram hruaitu tura kan thlantlin apiangte kaihhruaina hnuaiah hian kan awm a ngai tho tho tih pawh sawiin, “Chuvangin min hruaitu tur kan thlan dawn hian ngaihtuahna kan sen a ngai a. Ram hruaitu thlanna hi 'mi lar' emaw, 'mi fel ber' emaw 'Kohhran hruaitu' thlanna a ni lo a. 'Tu hi nge ram kaihruaitu atan tha ang a, tu hian nge a ngaihna hria a, tun hian nge tuna kan dinhmun aia tha zawkah min hlang kai thei ang?' tia Mizo thalaite hian kan ram dinhmun leh kan politics kalphung hi ngun taka kan zir peih a hun tawh khawp mai,” a ti a. “Tunhnai maia kan hriat lar em em Social Media hmang hian thu belhchian dawl lo, tlanchhe chunga midang beihna a la tam hle mai a, hei pawh hi ngaihtuah chian chuan a dawihzepthlakin sim a hun ta hle mai,” tiin “Politics-ah hian insawichhe tawn leh thu awmze nei loa inbei chiam chiam lovin a kal theih a, 'issue' te khelin debate awmze neite pawh a neih theih. Chu'ng atan chuan 'policy' te sawihoin 'ideology' kan neihte phawrh tlang ila, zawi zawiin kan ram hi kan siam tha thei ang tih ka ring,” tiin hetiana politics hi kan ngaihven a nih chuan thalai fel zawk, fing zawkte a cho chhuak ngei ang tih a rinawm tih a sawi bawk.