Empowering Mizoram Sports zirhona buatsaih a ni

Sports Minister Lalnghinglova Hmar chuan Aizawl naupang ten ‘Empowering Mizoram Sports’ kaltlangin infiamna lama an theihna an chherhriam ve theih nan AMC Corporator leh Local Council te chu mahni Bial leh Veng theuh ah hma la turin a chah.

Mizo naupang zinga India aiawha Olympic-a chhuak thei tur infiammi tam thei ang ber chherchhuak tura hmalakna, Empowering Mizoram Sports (EMS) chungchang AMC Corporator leh Local Council te hnena hrilhfiahna hun chu nimin khan Aizawl-a Administrative Training Institute (ATI) Conference Hall-ah neih a ni a, he hun hi Sports Minister Lalnghing-lova Hmar chuan hmanpuiin EMS chu engkim deuhthaw a thlawn a nih laiin, EMS kaltlanga naupang infiammi chherchhuah tuma diltu zingah Aizawl mi an awm meuh lo tih a sawi a. Aizawl Veng hrang hrangah naupang infiamna lama theihna bik nei an awm theuh a rin thu sawiin, naupang ten EMS hnuaia infiamna hrang hranga an theihna an hmuhchhuah a, an thiamna te an chher hriam ve theih nan Aizawl enkawltu AMC Corporator leh Local Council te chu anmahni Bial leh Veng theuhah hma la turin a chah a ni.

Sports Minister chuan, Infiammite Bana Kaih an tum dan chu Khawtlang hruaitu ten an hriat a tul avangin Mizoram State Sports Council (MSSC) buatsaihin he hun hi hman a nih thu a sawi a. National Games a in tehna-ah pawh Mizoram chu a thleng sang lo fo thin tih sawiin, hetih rual hian Sports ah sum a kal hnem tho thin avangin Medal emaw, Result tha emaw nei tura theihtawp chhuah a tul thu a sawi a ni.

Empowering Mizoram Sports (EMS) hi Mizoram Bana Kaih (Handholding) Policy 2024 hnuaia duan niin a tum ber chu kum 2036-a India-in Olympic a thlen tura India aiawh thei leh khawvel pum huap inelna hrang hranga tel pha Mizo infiammi tam thei ang ber chherchhuah a ni.