Vawiin-ah All India Radio kum 90-na lawm dawn
.jfif)
All India Radio kum 90 tlin lawmna pual hian AIR Aizawl chuan State chhungah a lawmna hrang hrang a buatsaih tawh a, Walkathon, Musical Concert bakah kum 90 tlin puala Mei det hawngin heng bakah hian thil hrang hrang buatsaih a ni bawk a. A lawmna pui ber hi Vawiin hian Chief Minister Lalduhoma hovin neih a ni dawn a ni. AIR in kum 90 a tling leh AIR Aizawl in kum 60 a tling hi ram hruaitute chuan an lawmpui thu an sawi a, Chief Minister Lalduhoma chun All India Radio in kum 90 a tling chu a lawmpui thu sawiin, Radio chu khawhar leh lungngaite awi tleitu ber a ni tih sawiin, “AIR chu rimawi hmanga mipuite awi tleitu, thuthar hrilhtu leh midang tana tangkai tur hrang hrang chhawp-chhuaktu a ni,” ti a ni a, Radio thuchhuak chu mipuiten rintlak berah an ngai thin tih sawiin, tunlai khawvel hmasawn zelah All India Radio chu ramchhunga mipuite thinlungah a hlut dan ala ngai reng tih sawiin, mipuite tana an hnathawh that chhunzawm zel turin a chah a ni.
Mizoram Larsap General (Rtd) Vijay Kumar Singh pawhin All India Radio chu ramchhung mipuite thu leh hla hmanga thlunzawmtu pawimawh tak a nih sawiin, AIR in kum 90 a tling chu a lawmpui thu a sawi a, a hlawhtlinna thlentu AIR-a thawk tawh zawng zawngte zahna chibai a buk a. AIR chuan kum upa leh naupang thlengin an ngaihthlak duh hrang hrang a chhawpchhuak thin tih sawiin, ramchhunga mipuite thlunzawmtu pawimawh tak a nih thu a sawi a ni. Larsap chuan AIR chuan thu dik leh rintlak a puan thin avangin mipuite rin a hlawh thu pawh sawiin, ramchhunga chanchinthar rintlak ber a ni tih a sawi a, thawktute chu All India Radio hmingthatna chhunzawm tura theihtawp chhuah turin a chah a ni.
Doordarshan Director General (Rtd) leh Mizoram Lok Sabha MP hlui C. Lalrosanga pawhin All India Radio chu mipuiten sawrkar hmalakna hrang hrang an hriat theihna hmun pawimawh tak anih thu a sawi a. All India Radio in kum 90 a tling chu a lawmpui thu sawiin, AIR chu mipuiten sawrkar kalphung an hriat theihna tur ngaihtuahtu a nih thu leh mipui hamthatna tur puangchhuakin hmun kilkhawr thlenga an tangkaipui a ni tih a sawi a, a hlut dan ala ngai reng tih a sawi bawk.
Finance Minister hlui Lalsawta pawhin AIR chu ramchhung ah mipuite rin hlawh ber anih thu leh Mizoram-ah pawh mipui tan tangkai takin hna a lo thawh tawh thin thu a sawi a, rambuai laiin mipuiten awlsam takin AIR Aizawl kaltlangin thuthar an hre thei tih sawiin, India zalenna sual kawngah pawh mipuite inpumkhatna siam saktu pawimawh tak a ni tih a sawi bawk.