Mizoram- Jail tang zingah thalai kum 18 leh 40 inkar an tam

Synod Prison Ministry-in Mizoram-a Lung In 10 a zirchianna-ah Jail tang 76.7% te chu thalai kum 18 atanga kum 40 inkar an ni a, an tan chhan tam ber chu ruihhlo a ni.

Synod Prison Ministry-in nikum June ni 16-a Inspector General of Prison phalna an dil anga Mizoram-a Jail 10-a mi tang 1,735 te an zirchianna chu tunhnai khan a tichhuak a. Jail tang zawng zawng zinga zaa 76.7 te chu thalai kum 18 atanga kum 40 inkar niin tang zingah kum 60 chunglam engemawzat an awm bawk a. Zirchianna chuan mipat-hmeichhiatna lama inthlahdahna leh sual dang a inzawm thuk hle nia sawiin, Jail tang zingah kum 18 tlin hmaa mipat-hmeichhiatna hmang tawh zaa 58.3 an awm a. Tang zingah lehkha zir sang lo an tam hle a, pawl 12 leh a hnuailam chu za a 91.3 an nih thu tarlan a ni bawk.

Jail tangte tan chhan tam ber chu ruihhlo niin, zu/ruihhlo ti leh ruihhlo tawlhruk vanga tang belhkhawm chu za a 47.8 a ni a. Rukruk leh mi rawk vanga tang zaa 25.5 awmin, pawngsual/khuaikhem/POCSO thubuai vanga tang chu zaa 18 a ni a. Tualthah leh ram dan bawhchhiatna dang vanga tang belhkhawm chu zaa 19.9 an awm bawk. Zirchianna chuan mihring bitna, khawpui ah sualna a pung nasa hle tih sawiin, Central Jail, Women Jail leh Aizawl District Jail-a tang belhkhawm chu Mizoram puma tang zawng zawng belhkhawm zaa 60.5 an tling a, Jail tang zawng zawng zaa 40.2 chu AMC huamchhung a mi te an ni a ti a. Ramri hnaihah sualna a sang tih theih turin District tina mihring cheng zat leh jail tang zat atanga chhutin ramri hrula district jail-ah te tang an tam niin a tarlang bawk.