Union Minister in zan khat riakin Kolasib a tlawh

Union Minister of State for Information & Broadcasting leh Parliamentary Affairs Dr. L. Murugan chuan Kolasib District tlawhin District thuneitute a kawm bakah hmun pawimawh dang te a tlawh bawk.

Union Minister Dr. L. Murugan hian niminpiah khan Kolasib hi thlengin Kolasib DC Conference Hall-ah tlawmngai pawl hrang hrang - YMA, MHIP, MUP leh MJA Kolasib aiawhte a kawm a. Prime Minister Narendra Modi leh sawrkar laipui chuan India Hmarchhak (North East) hmasawnna chu a ngai pawimawh hle tih sawiin, “Prime Minister chuan North East hmasawnna hi India ram hmasawnna a ni a ti thin a, chuvang chuan mipuite hmasawn theih nan kawngpui leh hmasawnna ruhrel (infrastructure) tihchangtlun kawngah pawh nasa takin hma a la a ni,” a ti a. Infiamna (Sports) leh hmeichhe dinhmun chawi-kanna lamah hmasawnna hmuh tur a awm chu lawmawm a tih thu sawiin, kum 2047-a India ram ropui leh hmasawn a nih theih nana hmachhawp, 'Viksit Bharat 2047' tihlawhtling turin theihtawp chhuah theuh turin a chah bawk.

Union Minister Dr. L. Murugan hian nimin khan Saidan-a Regional Sports Training Centre tlawhin RSTC zirlaiten Football Match lo entirin, he Centre tih changtlun lehzualna tura hmalakna tul zualte an sawipui a. Hemi hnu hian PM Govt. Model Primary School-I, PM School for Rising India chu tlawhin Zirlaite nen inkawmna hun hmangin India ram chu kum 2047-ah chuan ram hmasawnna tluantling nei turin a inbuatsaih mek thu a sawi a, chu inbuatsaihna tihlawhtling tur chuan zirlaite chu thawktu pawimawh tak an nih thu a sawi bawk. Hei bakah hian Diakkawn High School, Kolasib leh Kolasib-a ICAR te pawh tlawhin Thingdawl ICDS Project hnuaia kalpui, Kolasib Vengthar-a Anganwadi Centre pawh a tlawh a, thawktute bakah naupang leh nu leh pa te a kawm nghal bawk a ni.