MizoTaxi app hmasawnna rahbi pawimawh ah ngai

Mizoram Transformation Movement (MTM) chuan Mizoram-a ‘MizoTaxi app’ hman a ni tur chu hmasawnna rahbi pawimawh tak nia an hriat thu leh a hmangtu tur mipuite tan a thatna a tam hle-a a lan thu an sawi a, “Awlsam zawka hmun hrang hrang atanga Taxi hman tur mipuiten kan hmuh theihna tur te, man chawi tur zat chiang zawk leh tlawm zawk, langtlanga a awm turte hi he MizoTaxi app thatna thenkhatte a niin a lang,” an ti a. Amah-erawh chu Driver te tan MizoTaxi app a inziahluh man chawi a ngai chuan harsatna leh dodalna tam tak a thlen nia a lan thu pawh sawiin, “Taxi neitu leh khalhtute hian an inziahluh man hi chawi kher ngai lova inziahluh theih turin sawrkarin siam sak se kan ti hle,” an ti a. “Taxi neitu leh khalhtute lam pawhin uluk taka ngaihtuah chunga he MizoTaxi app hman chungchangah hian thutlukna siam turin kan ngen a. Mipui tam zawkin man tlawm zawk leh awlsam zawka taxi kan book theih a, kan hman theih chuan tun ai hian mipui tam zawkin taxi te kan hman phah ang,” an ti bawk.