Home Minister in Serchhip District Jail tlawhin thawktu ten an mamawh hrang hrang an lo thlen
Nimin-a Serchhip District Jail a tlawhna ah hian Home Minister hi Home Department Secretary Vanlalmawia leh Serchhip District Superintendent of Police Gavit Gogna te bakah sawrkar Official-te'n an tawiawm a, Serchhip District Jail sak that leh tih changtlun hna hi SASCI 2024-2025 hnuaiah cheng vbc. 3.7 senga thawh mek a ni a. Administrative Building thawmthat leh zauh belh hna te, Multipurpose Hall leh Barrack thar sak hna te, mi tang thenkhatte khung hranna tur ‘Segregation Cell’ leh Skill Training-na tur Vocational Hall sak hnate bakah Guard Duty Post leh MI Room tihzauh hna te, Male Ward - 2 (1st floor) leh Chapel sak that hna leh Staff Quarters leh Superintendent Quarters sak hna te thawh mek a ni a. Heng hnathawh hrang hrangte hi Home Minister chuan tlawhin, Contractor ten an hnathawh dinhmun leh an thlen chin te an lo hrilh bawk a. Home Minister chuan Mizoram District hrang hrang a tlawh tawhte zingah Serchhip District Jail chu ‘a fel faiin, mit a kham lo ber awm mang e aw' a tih thu a sawi a. Jail building sak that hna hrang hrang thawh mekah a thawktu PWD leh Contractor-te chu theihtawp chhuah zui zel turin a chah bawk.
Home Minister chuan Sawrkar hna hrang hrang zingah mihring enkawl, a bikin sualna kawnga tlu tawh Jail tangte enkawl chu hna hautak leh pawimawh em em a nih thu a sawi a. Jail chu mihring tha lo te rilru leh taksa siam thatna hmun a nih avangin, a hmingah pawh 'Prison and Correctional Services' tia thlak a nih tawh thu a sawi a, mi tangte chu rilru lamah chauh ni lo, taksa lamah pawh an lo hrisel zawk theih nan Medical Staff-te'n regular taka an tlawh thinna turin hmalak zui zel a nih tur thu a sawi bawk.
Nimin-a Serchhip District Jail a tlawhna ah hian Home Minister K. Sapdanga hi District Jail Superintendent, C. Vanlaltlana leh a thawhpui ten lo dawngsawngin an inkawm a, Home Department Secretary Vanlalmawia pawhin Jail tangte hriselna ngaih pawimawh a tul thu leh Medical duty ngaih pawimawh a tul thu bakah Jail vengtute tan, mi tangte enkawl dan leh thil hrang hrangah te training ngaih pawimawh a tul thute a sawi bawk a ni.
Serchhip District Jail enkawltute chuan Home Minister hnenah hian harsatna an tawh leh an mamawh te lo thlenin Staff Nurse an neih thin chu August 5, 2025 khan hmun dangah sawn a nih thu leh a aiawh tur dah a nih loh thu sawiin, hei hi a theih angin nawr thin mah se tun thlenga Staff Nurse hi dah an la nih loh thu leh Damdawi lama thiamna nei an awm loh avangin harsatna an neih fo thu an sawi a. Hei vang hian Staff Nurse an mamawh thu an lo thlen a. Jail tang te mamawh Water Cooler chu Mipa leh Hmeichhe Ward-ah an mamawh thu pawh lo thlenin Jail tang te hmanlai Television chu a that tawh loh avanga an mamawh thu te pawh an lo thlen bawk a ni.
Serchhip District Jail-ah hian Prison Department hnuaiah tun dinhmun ah Superintendent hovin thawktu mi 21 an awm mek a, Head Warder (Male) pahnih, Warders Mipa 9 leh Hmeichhia 4, PE Warders mipa pakhat leh hmeichhia pali bakah Chowkidar pakhat an awm bawk. Heng bakah hian venhimna lam hna thawk turin Home Guard Staff 17 an awm a, Prisons Staff ten Quarters 19 neiin Home Guard Staff Quarters pahnih leh Barrack pakhat bakah Office/NCO Quarters pakhat a awm a, Ambulance pakhat an nei bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!