SIR 2026 kalpui mek chungchangah ECI Deputy Director-in Mizoram a rawn tlawh

Election Commission of India (ECI)-a Deputy Director Apurva Kumar Singh IIS chuan Special Intensive Revision (SIR) of Electoral Rolls kalpui mek chu India khua leh tui kum 18 tling chin, Electoral Roll-a chuang theite kim taka Electoral Roll-a an chuan theihna tur leh vote nei thei lo te Roll-a an chuan lohna tura hmalakna a nih thu a sawi.

Election Commission of India (ECI) bultuma May ni 20, 2026 atanga September ni 6, 2026 inkar chhunga Electoral Roll siam that runpui, Special Intensive Revision (SIR) of Electoral Rolls kalpui mek chungchangah hian ECI Deputy Director Apurva Kumar Singh IIS, chuan Mizoram rawn tlawhin nimin khan Mizoram Chief Electoral Officer (CEO) Garima Gupta IAS nen a Pisa-ah an inkawm a. Hemi hnu hian MINECO Secretariat Conference Hall-ah Mizoram District hrang hranga Media lama mawhphurtu, District Media Nodal Officer (DMNO)-te nen Media & Communication chungchanga hmalakna kal mek an thlirho bawk a. He hunah hian ECI Deputy Director  Apurva Kumar Singh chuan SIR chu India khua leh tui kum 18 tling chin, Electoral Roll-a chuang theite kim taka Electoral Roll-a an chuan theihna tur leh vote nei thei lo te Roll-a an chuan lohna tura hmalakna pawimawh tak a nih thu a sawi a. SIR hlawhtling taka kalpui a nih theih nan Media kaltlanga zau taka puanzar leh hmalakna hrang hrangte tarlan a pawimawh thu sawiin, chumi atan chuan ruahmanna fel tak duan lawk a, chumi anga hmalak chu a pawimawh thu a sawi bawk.

He hun hi Mizoram Joint Chief Electoral Officer Ethel Rothangpuii chuan kaihruaiin District hrang hranga DMNO leh DMANO-te'n an hmalak tawhna leh hmachhawpte an sawi a. ECI Deputy Director Apurva Kumar Singh chuan powerpoint presentation hmangin ‘Media & Communication SOP’ zirtirin, SIR chungchang puanzar leh tihlar kawnga hma lak dan tur leh ngaih pawimawh tur hrang hrang a zirtir a. Zawhna leh chhanna leh sawi hona hun hman a ni bawk.

ECI Deputy Director Apurva Kumar Singh hian Vawiin-ah ERO Office tlawhin BLO ten Enumeration Form an sem dan te a enpui anga. Chawhnu lamah thuthar thehdarhtute a kawm zui nghal dawn bawk a ni.