Agriculture Minister-in MASA Conference a hmanpui

Mizoram Agriculture Service Association (MASA) chuan nimin khan Berawtlang Tourist Complex-ah General Conference vawi 10-na hmangin he hun hi Agriculture & Farmers’ Welfare Minister PC. Vanlalruata chuan a hmanpui a ni.

MASA General Conference-ah hian Minister PC. Vanlalruata chuan Mizoram-ah Mizoram Agriculture Service (MAS) Officer indaihlohna a nasa hle tih sawiin, Post ruak te hnawhkhah a nih theihnan a tul anga recruitment kalpui zel a tul thu a sawi a; MAS Officer kalkhawm te an hnathawhna kawngah theihtawp chhuah tur leh an hna chu farmer te tana hlawkna tur a ni tih hria a, sawrkar Scheme te bel taka zirchianga thawk turin a fuih a. Thawhhona kawngah pawh MAS Officer te chu an fakawm a tih thu sawiin, posting chungchangah pawh harsatna siam lova sawrkarin a dahna pianga awm zel thei turin thu a chah nghal bawk a ni.

Agriculture & Farmers’ Welfare Minister PC. Vanlalruata chuan Agriculture & Farmers’ Welfare Department-ah mipuiin beiseina sang tak an neih thu pawh sawiin, heng an beiseina te timit tu ni lovin tihlawhtlingtu ni thei turin a tul ang zelin mahni insiamrem a, sawrkar leh mipuite tan theihtawp chhuah zel turin MAS Officer te chu a fuih a. “Inlungrual taka mi tinin theihtawp kan chhuah theuh chuan kalphung thar, hma lam pan zel theihna tur danglamna kan thlen thei a ni,” tiin “Kan hnathawh te rawngbawlna angah ngai a, hah bik deuh te kan awm a nih pawhin vui lovin Pathian in mipui leh farmer te tana rawngbawl tura min dahna a ni tih hriain, hna kan thawk tur a ni,” tiin he huna kalkhawmte chu a fuih bawk a ni.