C&I Minister-in MAHCO General Assembly a hmanpui

Mizoram Apex Handloom & Handicraft Cooperative Society Ltd. (MAHCO) chuan nimin khan Annual General Assembly vawi 47-na an hmang a, Commerce & Industry Department changtu Minister F. Rodingliana chuan khuallian niin a hmanpui a ni.

Aizawl I&PR Auditorium a MAHCO Annual General Assembly-ah hian Minister F. Rodingliana chuan India ram hmun hrang hrangah Cooperative Society-te dinhmun pawimawhzia leh Mizoram-ah pawh kawng tam taka State intodelhna tura ban pawimawh tak an nihzia tarlangin, MAHCO chu mi tam tak eizawnna petu a ni tih a sawi a. Mizo puantah leh thiam-hnang hmanga siamchhuah thilte chu hnamdang pawhin an hlutpui hle thin tih sawiin, kan hnam hmel tilangtu leh hnam rohlu vawnthatna pawimawh tak pawh a nihzia te hre reng turin kalkhawmte chu a chah bawk.

Nimin-a MAHCO Annual General Assembly hi MAHCO Chairman Lalrinkima chuan kaihruaiin MAHCO-a Managing Director L. Lalzidingi hnen atangin kum 2025-26 inkara MAHCO dinhmun tlangpui leh hmalakna te ngaih-thlak a nih bakah Manager, Lalrinawma Pachuau hnen atangin MAHCO hmathlir leh hmalak zui zeldan tur (Annual Action Plan)-te ngaihthlak a ni bawk a. Member kum 70 chung lamte hnenah lawmpuina leh chawimawina thilpek hlan nghal a ni a. Registrar, Cooperative Societies John LT. Sanga pawhin he hun hi a hmanpui a ni.

MAHCO hi kum 1977 khan din niin tun dinhmunah MAHCO hnuaiah hian Cooperative Society 96 an awm mek a. Mizoram-ah hian puantah-a eizawng mi 25,134 lai an awm nia ngaih a ni a. RCS hnuaiah pawh Handloom & Handicraft Primary Society 180 vel awmin, heng zinga zaa 53 vel chu MAHCO hnuaiah hian an inziaklut a ni.