Mizoram-a Jail tang te zirchianna ah Retheihna avanga thilsual tih duhna nei an tam

Synod Prison Ministry in a zirchianna-ah Mizoram-a Tan In a táng zingah retheihna vanga thilsual tih duhna nei zaa 68.4 an awm a, Jail tang zinga 39.6% chu unau pianpui pali leh a chunglam nei niin Jail tang zinga an tan chhan tam ber chu ruihtheih thil niin kum 60 chunglam zingah POCSO Act vanga tang an tam bawk.

Synod Prison Ministry hian Zirtawpni khan Aizawl Ramhlun Vengchhak Presbyterian Kohhran Hall-ah Synod hnuaia hmun hrang hranga rawngbawltute leh tualchhung Kohhran hruaitute pualin 'Jail tang zirchianna' tih thupui zirhona an buatsaih a, he hunah hian Synod Prison Ministry Director Rev. Lalhleia chuan Synod Prison Ministry in Mizoram-a Jail hrang hranga tang te dinhmun chu nikum kum tawp lam khan zirchianna an neih thu a sawi a, Mizoram-a Jail 10 awmah Jail tang 1735 zinga 676-te chu zu leh ruihhlo kaihhnawiha tang an ni a, hei hi Jail tang zawng zawng atanga chhutin zaa 47.8 a ni tih a sawi a. Rev Lalhleia chuan Mizoram-a Jail táng zingah retheihna vanga thil sual tih duhna nei zaa 68.4 an awm thu sawiin, Jail tang an zirchian chhan ber chu Kohhran, NGO leh mimal thahnemngai rawngbawltute rawngbawlna a sawt em em laiin tun aia hma an sawn lehzualna tur hriat nan anih thu a sawi bawk.

Mizoram Presbyterian Kohhran hnuaia Synod Prison Ministry in Mizoram chhunga Jail 10 an zirchianna atanga a lan danin khawpuiah sualna a pung nasa a. Central Jail, Women Jail leh Aizawl District Jail-a tang belhkhawm chu Mizoram-a Jail tang zawng zawng atanga chhutin 60.5% an tling a, chung zingah chuan Aizawl khawpui pawn (AMC area pawn) lam mi 46.6% an tling a. Jail tang zawng zawng 59.8% chu AMC area pawn niin AMC area chhung 40.2% an ni. Zirchianna atanga a lan danin Jail tang zingah mipa an tam lawr lak a. Kum 2024 khan Mizoram-ah mihring 14,72,992 an awm nia chhut niin a tam zawk chu hmeichhia an ni a. Zirchianna atanga a lan dan chuan Jail tang mek zinga 91.4% chu mipa niin hmeichhia 8.4% an awm bawk a. Jail tang zingah thalai an tam ber a, kum 18 atanga 40 inkar 76.7% an tling a. Jail tang zinga 69.7% hi nupui/pasal nei tawh niin nupui/pasal pakhat mai lo deuh, pahnih pathum nei pawh 37.1% an tling bawk a ni.

Mizoram-a Jail tang zingah lehkha zir sang lo an tamin tang zinga 91.3% chu pawl XII leh a hnuailam an ni a, Jail tang mek zingah chhungkaw innghahna leh ei bel ni bawk 67.3% lai an awm a. Prison Ministry zirchianna atanga a lan danin tang zinga 14.6% zet chu HIV positive an ni bawk. Jail tang zinga 96.9% chuan Sex an hmang tawh tih an sawi a, kum 18 tlin hmaa sex hmang tawh chu 58.3%  niin invenna (condom) tel lova Sex hmang an tam hle bawk a ni.

Jail hrang hranga an tan chhan lian/tam ber chu ruihhlo a ni a, Zu/drugs leh ruihhlo tawlhruk vanga tang belhkhawm chu tang zawng zawng atanga chhutin 47.8% an ni a, rukruk/mi rawk vanga tang 25.5%, pawngsual/POCSO kaihhnawiha tang 18% leh thildang vanga tang 19.9% an ni a. Jail tan hmaa Kohhrana rawngbawlna chanvo chelh zat tawh chu 15.6% an nih bakah Chhandamna/Gospel Camping a pawh vawi duai lo lut tawh 69% an ni bawk. Tang zingah hian ruihtheil thil ti an tam hle a, tang zinga 83.9% chu zu in, 42.3% chu Heroin (No.4) khawih, Damdawi (tablet) khawih 24.2%, Ganja zu thin 30.6%, Methamphetamine khawih 8.2% an awm bawk. Tang zinga 55.35% chu ruihhlo-a sumdawng an ni a, kum tlin hmaa ruihhlo khawih tan 48.8% awmin Jail chhuah huna ruihhlo khawih zui tum 36.1% an awm bawk.

Jail tang zinga a tam zawk hi nu leh pa bula seilian an ni a, tang zinga 11.5% chauh ruihhlo khawih lo an ni a, Jail tang zingah kum upa lam engemaw zat an awm a, a tlangpuiin kum 60 chunglam tan chhan tam ber hi POCSO Act kaihhnawih a tang an ni.