Union Minister of State Dr. L. Murugan chuan Mizoram rawn thlengin I&PR Minister nen an inkawm
Union Minister hi Lengpui Airport-ah Information, Public Relations, Printing & Stationery Department changtu Minister B. Lalchhanzova leh Information & Communication Technology changtu Minister Dr. Vanlalthlana te bakah sawrkar hotu lian dang ten lo hmuakin Airport-ah hian thutkhawm an nei nghal a. I&PR Minister B. Lalchhanzova chuan Mizoram chhunga chanchinbu/media, Film Industry leh Digital Infrastructure tihmasawnna tura rawtna hrang hrang lo thlenin, Mizoram chhunga School 200 leh College 20-ah te Animation, Visual Effects, Gaming, leh Comics (AVGC) Content Creator Labs din a nih theih nan allocation siam sak turin a ngen a, hei hian thalaite zingah Digital Content siam lam leh eizawnna thar (entrepreneurship) a tih hmasawn beisei a nih thu a sawi a. National Film Development Corporation (NFDC) leh Film and Television Institute of India (FTII) te anga institution hmingthang te kaltlangin Mizo filmmaker-te tana Training & Skill Development Programme buatsaih a nih theihna turin a lo thlen bawk a ni.
Heng bakah hian kumin kumtir-a a vawi khatna atana buatsaih Lemchan Film Festival chu thlawpa neih chhunzawm zel a nih theihna tura hma laksak tur leh tualchhung thiamna leh kutchhuak te phochhuah rualin FiIm industry chhunga thawhhona tha zawk a awm theih nan he Festival hi ni 5 chhung tala pawtsei tura ngenna pawh Union Minister hnenah hian a lo thlen a, Hmarchhak (North East) State-te tan bik Cinema Theatre Infrastructure chei that leh din thar nan Scheme hrang siamsak turin an rawt a; hei hian tualchhung tawng, hnam zia leh nunphung vawnnun rualin hnathawh tur tam tak a siam dawn tih a sawi a. Information & Broadcasting Ministry hnenah Hmarchhak State-te tana 10% Gross Budgetary Support (GBS) dah hran atanga Mizoram sawrkar hnuaia project thar leh hmasawnna tura ruahman hna hrang hrangte sum sanction sak tura a ngen bakah Mizo filmmaker-ten ramchhung leh khawvel huap Film Festival liantham hrang hrangah te an tel ve theih nana Institutional Support pek chhunzawm zel turin a ngen bawk a ni.
Union Minister of State for Information & Broadcasting Dr. L. Murugan chuan heng mamawh an thlen te hi tihhlawhtlin ngei a tum thu sawiin, Mizoram Film Festival-ah pawh lo kal ve a chak thu a sawi bawk. Nimin vek khan Union Minister hian Kolasib a pan nghal a, Kolasib DC leh Official dangte nen an inkawm bakah Vawiin chawhma lam hian sawrkar hmalakna hrang hrangte pawh a tlawh nghal dawn a ni.
Comments
Post a Comment
I ngaihdan i sawi hian mipui ngaihdan i tarlang a ni!