N. Mualcheng-a Panchayat Bhawan sak thar RD Minister Prof. Lalnilawma’n a hawng

Rashtriya Gram Swaraj Abhiyan (RGSA) sum cheng nuai 20 senga sak N. Mualcheng khua a Panchayat Bhawan (VC House) sak thar chu nimin khan Rural Development Minister Prof. Lalnilawma chuan a hawng a, he hun hi Bialtu MLA leh Adviser to Chief Minister Lalmuanpuia Punte pawhin a hmanpui a ni.
Panchayat Bhawan sak thar hawnna hunah hian RD Minister Prof. Lalnilawma chuan N. Mualcheng khua ten VC House, Panchayat Bhawan thar tha tak an nei ta chu a lawmpui thu sawiin, Panchayat Bhawan sak diltu tam tak an awm thu leh chutiang kara a sakna tur sum an hmu thei chu a lawmpui thu a sawi a. Mipui Sawrkar hnuaiah sum tam vak lo senga hetianga khawtlang tana ro (asset) sa thei tura thawhhona tha an neih ah khawtlang hruaitute chu fakin, a enkawl zuina lamah theihtawp chhuah chhunzawm zel turin a chah nghal a. Sum indaihlohna karah khaw hrang hrangten an duh leh mamawh an sawi te chu Department ten an la tih hlawhtlin sak vek theih rih loh thu pawh sawiin, Ministry Level-a proposal an siam tlangpui a sawi a, Hrangturzo Bialtu MLA in a Bial mamawh leh harsatna a sawi te chu a hriatpui thu leh a tahtawl a tihhlawhtlin chhoh zel anih dawn thu a sawi bawk.

Rural Development & Administration Department (RD&AD) Minister chuan VC lawmman chu tlem-a tihpun a nih theih nan zirchian mek a nih thu pawh sawiin, politics tui nu tel lovin khawtlang hmasawnna tura tanrual a pawimawh thu a sawi a, Central leh State Sawrkar ten Vikshit Bharat Campaign Programme chu an ngaih pawimawh thu leh Minstry of Panchayati Raj pawhin 'Own Source of Revenue' (OSR) an ngasih pawimawh thu sawiin, 16th Finance Commission kan hman leh tur atan hemi kawngah hian Mizoram-a VC ten ruahmanna an lo siam thiam a pawimawh thu a sawi a. Khawtlang hmasawnna tura VC te pawimawhna hrang hrang pawh a sawi bawk. Minister hian N. Mualcheng VC ten 15th Finance Commission hnuaia hna an thawhna atanga an sum hman bang-a Bawlhhlawh Bawm an lei chu N. Mualcheng-a zirna In te hnenah a hlan nghal bawk.

N. Mualcheng-a Panchayat Bhawan sak thar hawnna hun hi Village Council Vice President R. Lalhruaia chuan kaihruaiin he hun hmanpuitu Bialtu MLA leh Adviser to Chief Minister Lalmuanpuia Punte chuan a Bial chhunga N. Mualcheng ten Panchayat Bhawan tha tak an nei chu a lawmpui thu leh Panchayat Bhawan la nei lo khaw thenkhat an awm thu sawiin, heng khua te pawh hian an neih thuai a beisei thu a sawi a. N. Mualcheng khua chu khaw taima leh Sawh-thing pawh thar tam khua an nih thu sawiin, kuthnathawktute tana tangkai tur tuilakna siam hna pawh Irrigation Department in Pilot Project angin ruahmanna an kalpui mek thu a sawi bawk.

He hunah hian DRDO Serchhip District-a Project Director, Dr. Malsawmtluanga Fanchun pawhin N. Mualcheng-a Panchayat Bhawan sak a nih dan tlangpui te sawiin, thla thar atanga a taka kalpui tur Viksit Bharat - Guarantee for Rozgar and Ajeevika Mission (Gramin), VB-G RAM G chungchang a sawi a, khawtlang tana tangkai tur lo ngaihtuah thiam turin VC te chu a chah a. Ani bakah hian East Lungdar BDO Dr. Marylin Lalruatkimi pawhin thu a sawi bawk a ni.

Mizoram-ah hian RGSA hnuaiah khaw panga (5) tan Panchayat Bhawan sakna tur sum hi chhuakin N. Mualcheng khuaa sakna tur hian cheng nuai sawmhnih (20) hmuh a ni a, ruahman lawk ang chuan ft. 26 X 28 a sak tur ni mah se VC ten inhlawhna sum an neih atangin cheng nuai khat ruahman belhin a dung ft. 37 leh a vang ft. 33-a lian in sak a ni ta zawk a, May 28, 2025-ah a sak hna hi tanin sak zawh a nih hnuah hawn a ni ta a ni. He Building-ah hian VC Sitting Room, VCP Room, Kitchen, Toilet leh Conference Hall te a awm a ni.