Special Cell thutkhawm nei

Nimin khan Serchhip-ah Solid Waste Management (SWM) chungchang ngaihtuahin Special Cell chu District Bawrhsap Paul L. Khuma hovin an thukhawm.
He thutkhawm Serchhip Bawrhsap Pisa-a neih ah hian kumin May ni 5-a SWM chungchanga Supreme Court thuchhuak te bawhzuia bawlhhlawh sawngbawlna kawnga hmalak mekna te thlirho a ni a, Bawrhsap Paul L. Khuma chuan Serchhip District chhungah bawlh-hlawh sawngbawl kawngah SWM Rules, 2026 tlawhchhana chak taka hma lak mêk a nih thu sawiin, SWM Rules ngai pawimawh lo leh zâwm lo te chu Supreme Court thuneihna dodal anga ngaih an nih dâwn avangin dan bawhchhetute chunga hremna pawh khauh taka kenkawh a nih tur thu a sawi a. Mipuite chu faina kawnga thahnem ngai tur leh dan ngai pawimawh tura chahin, he Danin a phut anga mawhphurhna neitu khawtlang hruaitute leh Department zawng zawngte pawh tha taka an mawhphurhna theuhte hlenchhuak turin a sâwm bawk a ni.

Solid Waste Management (SWM) Rules, 2026 hnuaiah hian bawlhhlawhte chu chi li (4) - Wet Waste (tawih thei), Dry Waste (tawih thei lo), Sanitary Waste (zun leh ek thiarna thil hrang hrang, diaper leh sanitary pads etc.) leh Special Care Waste (rawng bur, damdawi chhia, e-waste etc.) ah te thlairhran tawh tur an ni a. Hmun hrang hrangah tawih thei leh tawih thei lo paihna tur, Waste Segregation/Management Center-te sak mek a ni a. A paihna tura hmun bik ruahmanah te chauh hian bawlhlawh paih tur a ni dâwn a, khawlaia bawlhhlawh hal leh paih chu khap tlat a ni dawn bawk a ni.

He thutkhawmah hian Serchhip District khaw hrang hranga bawlhhlawh sawngbawlna kawnga hmalatu tur - Village Solid Waste Management Committee (VSWMC) din chungchang te, Village Council-te mawhphurhna leh Special Cell hnuaia department hrang hrangte hmalak mêk dante enin hmalak zel dan tur sawiho a ni.