E&N Deptt. in Red Card kalpui dan tur sawifiah

Excise & Narcotics Department-in hriselna kaihhnawihaZu lei phalna an siam, Red Card chu Doctor ten damdawi atana an chawh hnuah Medical Superintendent-in a pawmpui te chauh pek theih an ni dawn.
Thuthar thehdarhtute zawhna chhangin, Excise Department hotute chuan, Red Card chu Mizoram Liquor Prohibition (Amendment) Act, 2025-in a ken tel a ni a, Red Card chu kum khatah Rs. 5,000 man zel a ni dawn a, damdawi atana mamawh tak tak an nih chuan hei hi a to lo ni-a an hriat thu an sawi a, kum 21 tling chinte chauh phalna pek an ni dawn tih an sawi bawk. Red Card nei tur chuan Excise & Narcotics Office-ah dilna form Rs. 50/-in lak chhuah tur a ni a, tunah hian dilna an dawng mek bawk tih an sawi.

Dan in a phal angin, Aizawl-a Excise Pisa-ah Departmental Store siam a ni dawn a, an inpeih vek tawh a, dawr nghaktu tur pawh tihfel vek a ni tawh tih sawiin, chutah chuan Excise-in Zu an mante, Court-in a tihfel tawhte chu Red Card neite hnenah hralhchhuah a ni dawn a, Zu chu a um-a a man inziak atanga zaa 75-a tlawmin an hralh dawn a, sum lut chu Finance Department ah a lut zel dawn tih a sawi a, hmun dangah lei phal a ni dawn lo tih an sawi bawk.

MLP Act hun lai, kum 1997 atanga kum 2014 vel thleng khan Red Card hi hman a lo ni tawh thin a, kum 2014 atangin Zu permit pek a nih avangin a hranin Red Card hmanna dan chu siam a ngai tawh lo a. Kum 2019 vel atangin zu khapna dan hman chhoh leh a ni a, hetah hian Red Card chu hman a ni ta lo a, damlo zingah mamawh tak tak an awm tak avang leh an zu mante chu tih riral a ngaih tho si avangin ruahmanna siam a ni tih an sawi a. Mizoram tlawhtu khualzinten hmun dang atanga zu an lo kenluh phalna dan pawh siam a nih thu leh hei erawh hi chu hman hun tur tihfel ala nih loh thu an sawi bawk.