Tourism in PM Ekata Mall chungchang an sawifiah

Mizoram sawrkar-a Tourism Department chuan ‘PM Ekata Mall’ chungchangah thuchhuah siamin sum hman tawh dan leh hnathawh tawh dan te an sawifiah.

Hemi chungchanga thuchhuah an siamah Tourism Department chuan tunhnaiah Social Media-a PM Ekta Mall chungchanga thuthang dik lo tam tak awmin mipuite a ti-chiai tih sawiin, pawi an tih thu an sawi a. Aizawl Chawnpui Veng-a sak PM Ekta Mall chu India Prime Minister-in inlungrualna tha zawk India ramin a neih theih nan leh One District One Product (ODOP) chawisan nana project a duan zinga pakhat a nih thu sawiin, “He Project hi India ram State dangah te chuan Commerce & Industries Department-in an khawih laiin, Sawrkar hmasa khan Tourism Department chu hma la turin a lo ruat a ni,” an ti a. PM Ekta Mall atana sum ruahman hi Department for Promotion of Industry and Internal Trade of India-DPIIT, Govt. of India atanga sanction a nih theih nan ni 24.08.2023-ah DPR submit niin Poject Cost chu cheng vbc. 127 niin March 12, 2024 khan sanction niin hemi rual hian 50% (Cheng vbc. 63.50) dawn nghal a ni bawk tih an sawi.

A tirah PM Ekta Mall chu FCI Godown, Zuangtui-ah sak tur ni mah se Godown hi sawnchhuah theih a nih loh avangin Tourist Home, Zonuam-ah sak tum leh a ni a, hei pawh hi kum 10 chhung atana outsource a lo nih avangin Printing & Stationery Department ram, Chawnpui atan DPR siam leh a nih thu an sawi a. “IIFCL Projects Ltd. (CPSU under Ministry of Finance) hi Project Monitoring Unit (PMU), project vil leh endik (Supervision & Monitoring) atan rawih niin, HITES Ltd. (CPSU under Ministry of Health & Family Welfare)-te hi Executing Agency an ni thung,” an ti a. Contractor tura ruat SPG Infra Projects Pvt Ltd. te chu July 18, 2025-ah contract award pek an nih thu an sawi bawk a. Tun thleng hian Contractor SPG Infra Projects Ltd. te hnena HITES Ltd. in sum a release tawh zat chu cheng vbc. 1.46 niin hi hi sum release tawh cheng vbc. 63.50 atanga chhutin 2.30% chauh a la ni a, tuna a taka hnathawh tawh (physical progress) chu 18% a ni tih an sawi bawk.

Hei bakah hian Utilization Certificate chu 1st installment atanga 75% an hman zawh hnuah thehluh tur niin 2nd installment pawh 15th Finance Commission hun ralhmaa hnuhchhuah ngei a tul avangin UC hi zuk pek lailawk a ni tih an sawi a. “PM Ekta Mall sak chungchangah hian State tinte kan thlen chin a inang lo a, State thenkhatte chu a hmun tur la tifel lo te an awm laiin, a thente chu zofel tawh te pawh an awm a. Keini Mizoram pawh a hmun vawi thum lai kan thlak avangin State dangte aiin hna kan thawk tan tlai a, harsatna hriat lawk loh hmachhawn tur a awm tawh lo a nih chuan kum 2027 chawhma lamah chuan zawh theih beisei a ni,” an ti bawk.