Kawrthah North VC ten chawimawina an dawng

Ministry of Panchayat Raj (MoPR) buat-saihin tunkar Nilaini khan New Delhi-a Scope Convention Centre-ah ‘National Panchayat Awards Ceremony-2026’ neih a ni a, he hunah hian Mizoram atangin Kawrthah North Village Council chuan intihsiakna Category pakhat, Deen Dayal Upadhyay Panchayat Satat Vikas Puraskar hnuaiah lawmman an dawng a ni.
India ram-a Panchayats/Village Council te zinga rampum huap lawmman (National Panchayat Award) hmute chawimawina leh lawmpuina hun buatsaih ah hian Union Minister of Panchayati Raj Rajiv Ranjan Singh chuan Category hrang hranga National Panchayat Award dawngte hnenah lawmman Trophy leh Certificate a hlan a; Minister of State for Panchayati Raj, Prof. S.P Singh Baghel chuan kalkhawmte hnenah lawmpuina leh fuihna thu a sawi bawk a. Mizoram atanga Localization of Sustainable Development Goals (LSDG) Theme – 5 ‘Clean & Green Village’ category hnuaia Deen Dayal Upadhyay Panchayat Satat Vikas Puraskar (DDUPSVP) lawmman dawgtu Kawrthah North Village Council te pawhin Union Minister of Panchayati Raj, Rajiv Ranjan Singh (Pu Lalan Singh tia hriat ni bawk) hnen atangin lawmman Trophy leh Certificate an dawng a. Lawmman pawisafai cheng vbc. khat chu Kawrthah North Village Council Bank Account-ah thunluh fel nghal a ni bawk a. Hei hi khaw hmasawnna hna thawh nan tangkai tak hman tura ruahman a ni.

Kawrthah North Village Council ten LSDG Theme 5 ‘Clean & Green Village’ category hnuaia DDUPSVP lawmman pakhatna an dawn theih chhan hi khawtlang mipui ten Sawrkar hmalakna hrang hrang tha taka an thlawp vang leh theihtawp an chhuah vang a ni a, lawmman dawng tur hian Kawrthah North Village Council te hi kalin Department Officials ten an tawiawm bawk a ni.