Old Pension Scheme (OPS) hman phutin Vawiin-ah MIMOPS ten a huho-in chawlh la dawn

Zonuna Kawlni (LENKAWL) • June 8, 2026 • Comments • Mizoram

Mizoram Movement for Old Pension Scheme (MIMOPS) chuan Vawiin, June 8, 2026 hian an thilphut nawr nan a huhoa chawlh lak 'Mass Casual Leave' neih an tum.

Mizoram sawrkar in kum 2010 khan New Pension System (NPS) hmang tanin Central sawrkar in 2004-ah NPS hmang tanin tum engemawzat upgrade a ni tawh a, tunah hian NPS aiah Unified Pension System (UPS) a hmang leh tawh bawk a. Mizoram-ah chuan kum 2010 atangin NPS thlakna emaw, upgrade pakhatmah ala awm lova, central sawrkar hnuaia thawk leh Mizoram sawrkar hnuaia thawkte an inthlau tawh hle a ni tih Mizoram Movement for Old Pension Scheme chuan thuchhuah siamin an tarlang a. Mizoram sawrkar-ah NPS hnuaia pension an awm nual tawh a, an la awm belh zel dawn bawk nia sawiin, “Sawrkar tana thatlai hun leh tha hmangzo tute hian an upat hnuah innghahna tlak pension an neih ve hi an chanvo leh dikna a ni a. Chuvangin, Mizoram Movement for Old Pension Scheme hi December 5, 2022-ah din niin, NPS titawp (scrap) a Old Pension Scheme (OPS) a let leh tura hma la tu a ni,” tih an tarlang a ni.

MIMOPS thuchhuah chuan an ngenna avangin sawrkar in October ni 27, 2023 khan NPS Study Committee a din thu leh sawrkar ah Official Recommendation a thehluh atanga kum khat a liam hnuah pawh sawrkar ah thutlukna mumal tak emaw, kal zel dan tur (road map) siam a la ni lo tih an sawi a. Mizoram NPS chhe tak leh innghahna tlak loh hian sawrkar hnathawk chhungkaw tam tak, Kohhran leh khawtlang thlengin nghawng nasa tak a nei mek nia sawiin, Study Committee recommendation pawh Finance Department-ah a awm tawh a. Central sawrkar in All India NPS fund khawih tura a din, PFRDA-ah kan State Pension Fund tam tak kan dah ve a, Matching contribution leh Employee contribution thla tin an pek laiin NPS atanga pension chhuak Mizo ten chhuahpui an nei tlem em em lawi si niin an sawi a ni. MIMOPS chuan Vawiin, June ni 8, 2026 a Mass Casual Leave an kalpui tur chu sawrkar dodal na a ni lo tih sawiin, Pension tha lo NPS thlak ngiatna anih angin nghawng tha tak nei ngei se an duh tih an tarlang bawk.