Chief Minister in Project pahnih leh Workshop a hawng
Heng Project pahnih leh Workshop a hawnna hun Youth Recreation Hall (YRC), Falkland-a neih ah hian Chief Minister Lalduhoma chuan “Kan lo sawi tawh thin angin thlai thar leina Budget-ah kan dah a. Sawhthing hi kan lei tam ber leh lian ber a ni a, a thar pawh kan thar tam a. Mizoram Sawhthing hi a tè deuh nain a quality a lo tha bik hle a, damdawi-a hmantlak (pharma grade) a lo tling a. A pulunga kan hralh ringawt hian a tlawmin a hlawk tawk lova, sawngbawl hnu ngeia hralh hi a hlawk a. A chinna lamah tuna kan kal dan ang renga kan kal chuan kan leilungin a chhiatpui dawn si a. Dinhmun duhawm zawka kan din theih nan Vawiin-ah hma thar kan la ta a ni,” a ti.
Chief Minister chuan Ministry of DoNER kaltlangin Sawhthing hi kan Unique Selling Proposition-ah an puan thu leh Sustainable Cultivation & Post Harvest Management Project an siam thu sawiin, “DoNER hian phur takin hma min lakpui a, DoNER Minister Pu Jyotiradytia Scindia chungah kan lawm hle,” a ti a. “A chinna lama hmalakna (sustainable cultivation) hi chu Ministry hrang hrangte nena thawkhoa kalpui tur a ni a. Post Harvest Management atan bik hian DoNER hian cheng vbc. 30.13 min rawn pe a. Sawhthing thar tam ber District, Champhai District-ah Pilot angin Processing Unit changtlung tak pali din kan tum a, Vawiin-ah kan lo hawng ta a ni,” tiin he Project hi Sawhthing chingtu chhungkaw 20,000 in an chhawr tangkai turah an ngaih thu leh a process-na lamah hna thar 100 vel a siam bawk tur thu a sawi a. “Champhai District hi kan hlawhtlin phawt chuan District danga kalpui zelna tur sum pawh DoNER hian min pek an inhuam a ni,” a ti bawk a. Kan Sawhthing te chu khawvel huapa thehlar an tum dawn thu pawh sawiin, “A quality that bikna te, GI Tag a nih tawhna te behchhanin Sawhthing Oil leh thildang hlu tak tak siamchhuah kan tum bawk,” tiin “Kan Sawhthing hmun leh Global Market hi thlunzawm kan tum tan dawn a ni,” a ti.
Sawrkar laipui in kumin atan PM-AASHA hnuaiah Price Support Scheme a rawn siam thu leh Mizoram-a kan thlai chin Arhar Dal te, Nihawichi te leh Chhawhchhi te chu kalpui ve tur a nih thu Chief Minister chuan sawi bawkin, “Kumin tharchhuah atanga kalpui ve nghal tur a ni,” a ti a. “Arhar Dal hi Minimum Support Price kg khat Rs. 84.50 a ni ang a, Nihawi hi kg khat Rs. 83.43 a ni ang a, Chhawhchhi hi kg khat Rs. 103.46 a ni ang. National Agricultural Cooperative Marketing Federation of India in Mizoram tharchhuahte hi a leisak anga, Mizoram Agricultural Marketing Board (MAMB) nen an thawkho ang a, Collection Centre an rawn siam dawn a ni. He Minimum Support Price aia sanga hralhna hriate chuan an hralh zel thei a, Support Price scheme hi inphuartir loh tur a ni. He Scheme kaltlanga hralhte chu Direct Benefit Transfer hmangin an Account-ah pawisa thun zel a ni ang a, Middleman an awm lovang. State sawrkarin thlai thar panga (5)-a Minimum Support Price kan pek hnuah Central sawrkar kaltlangin thlai dang pathum (3) kan pe leh dawn ta a. Loneitute tan khua a var mek a ni,” a ti bawk.
Nimin-a Project pahnih leh Workshop hawnna hunah hian Agriculture Minister PC. Vanlalruata leh Horticulture Minister C. Lalsawivunga te pawh telin Agriculture & Farmers Welfare Secretary Ramdinliani chuan inlawmna thu a sawi bakah Horticulture Secretary Maria CT. Zuali chuan Ginger Processing Unit din dan tur ruahmanna tlangpui a sawi bawk a, mi 250 vel an tel a ni.
Comments
Post a Comment
I ngaihdan i sawi hian mipui ngaihdan i tarlang a ni!