Aizawl-ah New Age Technology Skill Lab hawn a ni

India hmarchhak-a a hmasa ber turin ‘New Age Tech Skills Centre’ thar chu Zirtawpni khan School Education Minister Dr. Vanlalthlana chuan Aizawl Model Veng-a Govt. Comprehensive Model School-ah a hawng.

Mizoram sawrkar leh Bharat Forge te chuan he Centre hi Bharat Forge Ltd. CSR (Corporate Social Responsibility) atanga dinin a hawnna hunah hian Education Minister Dr. Vanlalthlana chuan Bharat Forge te nen thawkhova New Age Technologies zirna Skill Lab an din chu lawmawm a tih thu leh zirlaiten an tangkaipui ngei a beisei thu a sawi a. Skill Lab hawn tak chuan zirlaite zir dan phung a thlak danglam dawn tih sawiin, “Education chu tun hma chuan ziak, chhiar leh vawn a ni mai a, tunah erawh chuan khawvel a inthlak danglam nasa tawh a, engnge kan siam theih tih leh kan chinfel theih tih hi a ni tawh zawk,” a ti a. Robotics sang tak tak te, Drone te, 3D printing te Simusoft atanga kan hmuh theih bungrua hrang hrangte chu a tha hlawm hle tih sawiin, zirlaiten an thil hriat leh thiam te chu hmuh theiha an chantir theih a beisei thu a sawi a. Bharat Forge ten zirtirtute training pe a, zirlaibu an pe bawk chu a lawmthu a sawi bawk.

He hunah hian Bharat Forge-a Vice President leh Head CSR Dr. Leena Deshpande pawhin Bharat forge chu thilsiamtu industry a nih thu te, khawl chi hrang hrang part, lirthei leh thlawhna thlenga siamtu a nih thu te, hmun hrang hranga  hna an thawh dan leh hmachhawp te a sawi bawk. 

New Age Technology Skill Lab atan hian Bharat Forge hnuai atang hian Simusoft Technologies te chuan Skill Lab din hna an thawk a, software hmanga Robot khawl chi hrang hrang hnathawk thei tura design dan zirna a ni. Industry lian tak taka khawl hmanga hna an thawh dan te, mamawh dan a zira khawl siam dan turte he Skill Lab atang hian an zir dawn a ni.