Health Minister in Serchhip rawn tlawhin Department hmalakna leh dinhmun a enfiah

Health Minister Lalrinpuii chuan nimin khan Serchhip rawn tlawhin District Hospital sak mek chu a hmunah a thlir a, CSR Fund chungchangah Power Grid Corporation of India Limited (PGCIL) lamin MoU an la ziahfel theih loh thu sawiin, Mizoram sawrkar lam chuan an tih tur chin an tihfel vek tawh thu a sawi bawk.
Nimin-a Serchhip tlawhtu Health Minister Lalrinpuii hi District Medical Superintendent (DMS) Dr. ZD. Lalmuanawma leh thawk dang ten lo dawngsawngin DMS Pisa-ah an inkawm a, he hunah hian damdawi In-a thawktute chuan an hnathawh dan tlangpui lo sawiin, an mamawh leh harsatna hrang hrangte an lo thlen bawk a. District Hospital-a thawktute chuan damdawi In building sak mek avanga khum indaihlohna phuhrukna tura 15 Beded Makeshift Ward sak thar chu luah theih a nih dawn tak avangin Doctor leh Nurse bakah thawktu dang mamawh belh a nih thu an an lo thlen bakah District Hospital Serchhip-a Doctor pathum- Pathologist, Orthopedicts leh Family Medicine te chu thlaktu dah lova sawnchhuah an nih avanga thawktu indaihlohna chungchang bakah Nurse te pawh hmundang ah pawhpen an nih avanga indaihlohna a nasat thu leh Laboratory Technician leh Ambulance Driver indaihlohna a harsatna awm te pawh an lo thlen bawk a ni.

Health Minister chuan thawktu indaihlohna phuhru turin sawrkar in hma a lak mek thu sawiin, Nurse indaihlohna pawh phuhru turin MPSC kaltlanga lak tum mek a nih thu a sawi a. Laboratory Technician indaihlohna chungchang ah pakhat dah belh a nih tur thu a sawi bawk a. District Hospital Building thar sak mek a ni chu lawmawm a tih thu sawiin, chak zawka sak hna pawh thawh theih dan tur a ngaihtuahpui thu a sawi bawk.

Health Minister Lalrinpuii hi Sub-Hqrs. YMA Serchhip hruaitute pawhin DMS Pisa-ah hian lo hmu nghalin tunhnaia Sub-Hqrs. YMA Inkhawmpui an neih tuma an thurel te an lo thlen a. Serchhip Damdawi In Building sak mek chu chak zawka hnathawh a nih theihna tura an lo thlen chu Health Minister chuan CSR Fund chungchang ah Power Grid Corporation of India Limited (PGCIL) lamin MoU an la ziahfel theih loh thu sawiin, Mizoram sawrkar lam chuan an tih tur chin an tihfel vek tawh thu a sawi a, PGCIL lamah pawh chak taka bawhzui zel a tum thu a sawi bawk a. Hei bakah hian Block B sakna tur sum NESIDS atanga hmuh turte pawh hmuh thuai a nih theih nan thuneitute hnenah bawhzui a nih tur thu a sawi bawk.

Serchhip damdawi In-ah Doctor thiam dah belh chungchang YMA lamin an lo thlen chu Ser-chhip-a Doctor awm tur Pathologist leh Orthopedic lak tum mek anih thu a sawi a, Doctor dang chu Hospital sa mek a nih avangin tih belh vak a harsat thu a sawi bawk a. Mizoram-ah Rualbanlote leh rilru lam buaite enkawlna hmun bik, State Integrated Rehabilitation & Care Centre, Mental Health & Disability Care neih ve ni se tia an thlen chungchang ah pawh Minister chuan Aizawl District-ah chauh ni lo, District tina dah tura hmalak mek a nih thu a sawi bawk a ni.

Health Minister Lalrinpuii hian New Ser-chhip Bazar Veng-a Mercy Hospital (Rural Diagnostics & Research Centre) pawh tlawh nghalin, Hospital Ward leh Cabin hrang hranga damlo te tlawh a; New Serchhip khawtlang hruaitute nen inkawmna nei zuiin mipui vantlang hriselna kawnga hmalakna tur leh Urban Primary Health Centre (UPHC) leh Sub-Centre te tih hmasawnna tur leh mipuite tan tangkai lehzuala hman a nih theih dan turte an sawiho bawk a ni.

Serchhip-a rawn kal Health Minister Lalrinpuii hian Serchhip Press Club pawh tlawh nghalin MJA Serchhip District hruaitu ten an lo dawngsawng a. Press Club Building sak thar tura hmalakna awm mek te an lo hrilhfiah nghal bawk a ni.