NEC Plenary atan Mizoram inpuahchahna thlirho

North Eastern Council (NEC) Plenary vawi 73-na chu naktuk, June 4, 2026 hian Shillong (Meghalaya)-ah neih a ni dawn a, hemi atana Mizoram inpuahchahna te chu niminpiah khan Larsap General (Dr) Vijay Kumar Singh hovin Lok Bhavan Conference Room-ah thlirho a ni.
He hunah hian kum 2024 December thlaa NEC Plenary vawi 72-na Agartala (Tripura)-a neiha Mizoram kaihhnawih hmalakna tura tih bawhzui a nih dante bakah NEC Plenary, Shillong atana inpuahchahna te chu Planning & Programme Implementation Department Secretary David Lalthantluanga chuan Powerpoint Presentation hmangin a sawifiah a. NEC leh Ministry of DoNER hnuaia projects kalpui mek - NEC funded Projects, NESIDS (Roads), NESIDS (OTRI) leh PM-DevINE Projects chungchang te sawiho a ni a. Heng bakah hian NEC Plenary-a Mizoram hamthat nana thlen tur pawimawh hrang hrangte sawiho a ni bawk.

Larsap General (Dr) Vijay Kumar Singh chuan India hmarchhak State hrang hrangte hmasawnna Sawrkar laipuiin a dah pawimawh thu sawiin, Union Home Minister hova neih tur NEC Plenary-ah Mizoram hmalakna leh mamawh te tha taka thlen a nih theih nan Line Department hotute chu theihtawp chhuah turin a chah a ni.

He thutkhawm ah hian GAD Principal Secretary Sudhir Kumar; Cooperation Department Commissioner & Secretary Udit Prakash Rai; Commissioner & Secretary to Governor Vinod P. Kavle; Sports & Youth Services Commissioner & Secretary V. Lalsangliana; Agriculture Secretary Ramdinliani; Planning & Programme Implementation Department Secretary David Lalthantluanga; Horticulture Secretary Maria CT Zuali; Commerce & Industries Secretary Dr. H. Lianzela; Information & Communication Technology changtu Secretary Dr. YLN Reddy leh Official pawimawh dangte an tel a ni.