Damdawi In lian pahnih-a Power khaihlak a awm lohna tura hmalakna a hmunah enfiah a ni

Health & Family Welfare Department changtu Minister Lalrinpuii leh Power & Electricity Department changtu Minister F. Rodingliana te chuan Inrinni khan Civil Hospital Aizawl leh Zoram Medical College & Hospital te tlawhin heng damdawi In lian pahnih-a chhum lo chat lova Power Supply pekna tur leh hmalakna tur hmachhawp dangte a hmunah an en.

Minister pahnih te hian Civil Hospital Aizawl chawmtu tur bik Dedicated Power Line siamna hnathawh bul tan dan tur an en a, ruahman dan chuan Civil Hospital Aizawl powerline hi direct in Indoor Sub-Station atanga lak tur a ni a, hemi atan hian cheng vaibelchhe khat chuang ruahman a ni a. Power supply khaihlak thulha Hospital pumpui chawm thei tur 500 kVA Diesel Generator dahna tur hmun pawh enho nghal a ni a, Diesel Generator leina tur hi P&E Department kutah pawisa pek tawh niin bunfel thuai tum a ni a. Hmun pawimawh zual- ICU, Blood Bank, Haemodialysis Unit leh Operation Theater te chawmtu tur power backup keng tel 20 kVA Solar Plant dahna turte an en nghal bawk a ni.

Civil Hospital, Aizawl an tlawh zawh hian Minister pahnih te hian Falkawn-a Zoram Medical College & Hospital (ZMC&H) tlawh lehin NESIDS (OTRI) atanga sum hmuh cheng vbc. 13.14 senga 1.5 MW Solar Plant dahna tur leh heta tanga kawlphetha siamchhuahte ZMC chhunga semkualna tur kilometer khat-a thui Distribution Line leh 500kVA Distribution Transformer thar pathum dah belh dan turte a hmunah hian an ennghal a. ZMC&H-a Solar Plant dah tur 1.5 MW atang hian 1.2 MW hi On-Grid tur niin 0.3 MW hi Hybrid Mode vuah tur a ni bawk.

Heng damdawi In pahnih an tlawhna ah hian Minister te chuan kan damdawi In liante khaihlak lova 24X7 power pekna turin heng ruahmanna te hi siam a nih thu an sawi a. A bik takin hmun pawimawh zual ICU, Blood Bank, Haemodialysis Unit leh Operation Theater te chu thlur bing zual a nih tur thu sawiin, reilote ah hna thawh tan a nih tur thu an sawi bawk.